[ಋಗ್ವೇದ ಸಂಹಿತಾ ಖಿಲಸ್, ಮಂಡಲ-5]
ಹಿರ॑ಣ್ಯವರ್ಣಾಂ॒ ಹರಿ॑ಣೀಂ ಸು॒ವರ್ಣ॑ರಜ॒ತಸ್ರ॑ಜಾಮ್। ಚಂ॒ದ್ರಾಂ ಹಿ॒ರಣ್ಮ॑ಯೀಂ ಲ॒ಕ್ಷ್ಮೀಂ ಜಾತ॑ವೇದೋ ಮ॒ ಆವ॑ಹ॥
ತಾಂ ಮ॒ ಆವ॑ಹ॒ ಜಾತ॑ವೇದೋ ಲ॒ಕ್ಷ್ಮೀಮನ॑ಪಗಾ॒ಮಿನೀ᳚ಮ್। ಯಸ್ಯಾಂ॒ ಹಿರ॑ಣ್ಯಂ ವಿಂ॒ದೇಯಂ॒ ಗಾಮಶ್ವಂ॒ ಪುರು॑ಷಾನ॒ಹಮ್॥
ಅ॒ಶ್ವ॒ಪೂ॒ರ್ವಾಂ ರ॑ಥಮ॒ಧ್ಯಾಂ ಹ॒ಸ್ತಿನಾ᳚ದ ಪ್ರ॒ಬೋಧಿ॑ನೀಮ್। ಶ್ರಿಯಂ॑ ದೇ॒ವೀಮುಪ॑ಹ್ವಯೇ॒ ಶ್ರೀರ್ಮಾ᳚ ದೇ॒ವೀ ಜು॑ಷತಾಂ॥
ಕಾಂ॒ಸೋ॒ಸ್ಮಿ॒ ತಾಂ ಹಿರ॑ಣ್ಯಪ್ರಾ॒ಕಾರಾಮಾ॒ರ್ದ್ರಾಂ ಜ್ವಲಂ॑ತೀಂ ತೃ॒ಪ್ತಾಂ ತ॒ರ್ಪಯಂ॑ತೀಮ್। ಪ॒ದ್ಮೇ॒ ಸ್ಥಿ॒ತಾಂ ಪ॒ದ್ಮವ॑ರ್ಣಾಂ॒ ತಾಮಿ॒ಹೋಪ॑ಹ್ವಯೇ॒ ಶ್ರಿಯಮ್॥
ಚಂ॒ದ್ರಾಂ ಪ್ರ॑ಭಾ॒ಸಾಂ ಯ॒ಶಸಾ॒ ಜ್ವಲಂ॑ತೀಂ॒ ಶ್ರಿಯಂ॑ ಲೋ॒ಕೇ ದೇ॒ವಜು॑ಷ್ಟಾಮುದಾ॒ರಾಮ್। ತಾಂ ಪ॒ದ್ಮಿನೀ॑ಮೀಂ॒ ಶರ॑ಣಮ॒ಹಂ ಪ್ರಪ॑ದ್ಯೇಽಲ॒ಕ್ಷ್ಮೀರ್ಮೇ॑ ನಶ್ಯತಾಂ॒ ತ್ವಾಂ ವೃ॑ಣೇ॥
ಆ॒ದಿ॒ತ್ಯವ॑ರ್ಣೇ॒ ತಪ॒ಸೋಽಧಿ॑ಜಾ॒ತೋ ವನ॒ಸ್ಪತಿ॒ಸ್ತವ॑ ವೃ॒ಕ್ಷೋಽಥ॑ ಬಿ॒ಲ್ವಃ। ತಸ್ಯ॒ ಫಲಾ᳚ನಿ॒ ತಪ॒ಸಾನು॑ದಂತು ಮಾ॒ಯಾಂತ॑ರಾ॒ಯಾಶ್ಚ॑ ಬಾ॒ಹ್ಯಾ ಅ॑ಲ॒ಕ್ಷ್ಮೀಃ॥
ಉಪೈ॑ತು॒ ಮಾಂ ದೇ᳚ವಸ॒ಖಃ ಕೀ॒ರ್ತಿಶ್ಚ॒ ಮಣಿ॑ನಾ ಸ॒ಹ। ಪ್ರಾ॒ದು॒ರ್ಭೂ॒ತೋಽಸ್ಮಿ॑ ರಾಷ್ಟ್ರೇ॒ಽಸ್ಮಿನ್ ಕೀ॒ರ್ತಿ॒ ವೃ॑ದ್ಧಿಂ ದ॒ದಾತು॑ ಮೇ॥
ಕ್ಷುತ್ಪಿ॑ಪಾ॒ಸಾಮ॑ಲಾಂ ಜ್ಯೇ॒ಷ್ಠಾಮ॒ಲ॒ಕ್ಷೀರ್ನಾ॑ಶಯಾ॒ಮ್ಯಹಮ್। ಅಭೂ॑ತಿ॒ಮಸ॑ಮೃದ್ಧಿಂ॒ ಚ ಸರ್ವಾಂ॒ ನಿರ್ಣು॑ದ ಮೇ॒ ಗೃಹಾತ್॥
ಗಂಧದ್ವಾ॒ರಾಂ ದು॑ರಾಧ॒ರ್ಷಾಂ॒ ನಿ॒ತ್ಯಪು॑ಷ್ಟಾಂ ಕರೀ॒ಷಿಣೀ᳚ಮ್। ಈ॒ಶ್ವರೀಂ᳚ ಸರ್ವ॑ಭೂತಾ॒ನಾಂ॒ ತಾಮಿ॒ಹೋಪ॑ಹ್ವಯೇ॒ ಶ್ರಿಯಮ್॥
ಮನ॑ಸಃ॒ ಕಾಮ॒ಮಾಕೂ᳚ತಿಂ ವಾ॒ಚಃ ಸ॒ತ್ಯಮ॑ಶೀಮಹಿ। ಪ॒ಶೂ॒ನಾಂ ರೂ॒ಪಮನ್ನ॑ಸ್ಯ॒ ಮಯಿ॒ ಶ್ರೀಃ ಶ್ರ॑ಯತಾಂ॒ ಯಶಃ॑॥
ಕ॒ರ್ದಮೇ॑ನ ಪ್ರ॑ಜಾಭೂ॒ತಾ॒ ಮ॒ಯಿ॒ ಸಂಭ॑ವ ಕ॒ರ್ದಮ। ಶ್ರಿಯಂ॑-ವಾ॒ಸಯ॑ ಮೇ ಕು॒ಲೇ॒ ಮಾ॒ತರಂ॑ ಪದ್ಮ॒ಮಾಲಿ॑ನೀಮ್॥
ಆಪಃ॑ ಸೃ॒ಜಂತು॑ ಸ್ನಿ॒ಗ್ಧಾ॒ನಿ॒ ಚಿ॒ಕ್ಲೀ॒ತ ವ॑ಸ ಮೇ॒ ಗೃಹೇ। ನಿ ಚ॑ ದೇ॒ವೀಂ ಮಾ॒ತರಂ॒ ಶ್ರಿಯಂ॑ ವಾ॒ಸಯ॑ ಮೇ ಕು॒ಲೇ॥
ಆ॒ರ್ದ್ರಾಂ ಪು॒ಷ್ಕರಿ॑ಣೀಂ ಪು॒ಷ್ಟಿಂ॒ ಪಿಂ॒ಗ॒ಲಾಂ ಪ॑ದ್ಮಮಾ॒ಲಿನೀಮ್। ಚಂ॒ದ್ರಾಂ ಹಿ॒ರಣ್ಮ॑ಯೀಂ ಲ॒ಕ್ಷ್ಮೀಂ ಜಾತ॑ವೇದೋ ಮ॒ ಆವ॑ಹ॥
ಆ॒ರ್ದ್ರಾಂ ಯಃ॒ ಕರಿ॑ಣೀಂ ಯ॒ಷ್ಟಿಂ॒ ಸು॒ವ॒ರ್ಣಾಂ ಹೇ॑ಮಮಾ॒ಲಿನೀಮ್। ಸೂ॒ರ್ಯಾಂ ಹಿ॒ರಣ್ಮ॑ಯೀಂ ಲ॒ಕ್ಷ್ಮೀಂ॒ ಜಾತ॑ವೇದೋ ಮ॒ ಆವ॑ಹ॥
ತಾಂ ಮ॒ ಆವ॑ಹ॒ ಜಾತ॑ವೇದೋ ಲ॒ಕ್ಷೀಮನ॑ಪಗಾ॒ಮಿನೀ᳚ಮ್। ಯಸ್ಯಾಂ॒ ಹಿರ॑ಣ್ಯಂ॒ ಪ್ರಭೂ॑ತಂ॒ ಗಾವೋ॑ ದಾ॒ಸ್ಯೋಽಶ್ವಾ॑ನ್, ವಿಂ॒ದೇಯಂ॒ ಪುರು॑ಷಾನ॒ಹಮ್॥
ಮ॒ಹಾ॒ದೇ॒ವ್ಯೈ ಚ॑ ವಿ॒ದ್ಮಹೇ॑ ವಿಷ್ಣುಪ॒ತ್ನೀ ಚ॑ ಧೀಮಹಿ। ತನ್ನೋ॑ ಲಕ್ಷ್ಮೀಃ ಪ್ರಚೋ॒ದಯಾ᳚ತ್॥
ಫಲಶ್ರುತಿ
ಯಃ ಶುಚಿಃ॒ ಪ್ರಯ॑ತೋ ಭೂ॒ತ್ವಾ ಜು॒ಹುಯಾ᳚ದಾಜ್ಯ॒ ಮನ್ವ॑ಹಂ। ಶ್ರಿಯಃ॑ ಪಂ॒ಚದ॑ಶರ್ಚಂ॒ ಚ ಶ್ರೀ॒ಕಾಮಃ॑ ಸತ॒ತಂ ಜ॑ಪೇತ್॥
ಓಂ ಶಾಂತಿಃ॒ ಶಾಂತಿಃ॒ ಶಾಂತಿಃ॑॥
ಸಕ್ತು॑ಮಿವ॒ ತಿತ॑ಉನಾ ಪು॒ನಂತೋ॒ ಯತ್ರ॒ ಧೀರಾ॒ ಮನ॑ಸಾ॒ ವಾಚ॒ಮಕ್ರ॑ತ। ಅತ್ರಾ॒ ಸಖಾ᳚ಯಃ ಸ॒ಖ್ಯಾನಿ॑ ಜಾನತೇ ಭ॒ದ್ರೈಷಾಂ᳚ ಲ॒ಕ್ಷ್ಮೀರ್ನಿಹಿ॒ತಾಧಿ॑ ವಾ॒ಚಿ॥
ಪರಿಶಿಷ್ಟ
ಪ॒ದ್ಮಾ॒ನ॒ನೇ ಪ॑ದ್ಮ ಊ॒ರೂ॒ ಪ॒ದ್ಮಾಕ್ಷೀ॑ ಪದ್ಮ॒ಸಂಭ॑ವೇ। ತ್ವಂ ಮಾಂ᳚ ಭ॒ಜಸ್ವ॑ ಪ॒ದ್ಮಾ॒ಕ್ಷೀ॒ ಯೇ॒ನ ಸೌ᳚ಖ್ಯಂ ಲ॒ಭಾಮ್ಯ॑ಹಂ॥
ಅಶ್ವ॑ದಾ॒ಯೀ ಗೋ॑ದಾ॒ಯೀ॒ ಧ॒ನದಾ॑ಯೀ ಮ॒ಹಾಧ॑ನೇ। ಧನಂ ಮೇ॒ ಜುಷ॑ತಾಂ ದೇ॒ವಿ॒ ಸ॒ರ್ವಕಾ॑ಮಾಂಶ್ಚ॒ ದೇಹಿ॑ ಮೇ॥
ಪುತ್ರಪೌ॒ತ್ರ ಧ॑ನಂ ಧಾ॒ನ್ಯಂ ಹ॒ಸ್ತ್ಯಶ್ವಾ॑ದಿಗ॒ವೇ ರ॑ಥಂ। ಪ್ರ॒ಜಾ॒ನಾಂ ಭ॑ವಸಿ ಮಾ॒ತಾ ಆ॒ಯುಷ್ಮಂ॑ತಂ ಕ॒ರೋತು॑ ಮಾಂ॥
ಧನ॑ಮ॒ಗ್ನಿರ್ಧ॑ನಂ ವಾ॒ಯುರ್ಧ॑ನಂ॒ ಸೂರ್ಯೋ॑ ಧನಂ॒ ವಸುಃ॑। ಧನ॒ಮಿಂದ್ರೋ॒ ಬೃಹ॒ಸ್ಪತಿ॒ರ್ವರು॑ಣಂ॒ ಧನ॒ಮಶ್ನು॑ ತೇ॥
ವೈನ॑ತೇಯ॒ ಸೋಮಂ॑ ಪಿಬ॒ ಸೋಮಂ॑ ಪಿಬತು ವೃತ್ರ॒ಹಾ। ಸೋಮಂ॒ ಧನ॑ಸ್ಯ ಸೋ॒ಮಿನೋ॒ ಮಹ್ಯಂ॒ ದದಾ॑ತು ಸೋ॒ಮಿನಃ॑॥
ನ ಕ್ರೋಧೋ ನ ಚ॑ ಮಾತ್ಸ॒ರ್ಯಂ ನ॒ ಲೋಭೋ॑ ನಾಶು॒ಭಾ ಮ॑ತಿಃ। ಭವಂ॑ತಿ॒ ಕೃತ॑ಪುಣ್ಯಾ॒ನಾಂ ಭ॒ಕ್ತಾನಾಂ ಶ್ರೀಸೂ᳚ಕ್ತಂ ಜ॒ಪೇತ್ಸ॑ದಾ॥
ವರ್ಷಂ॑ತು॒ ತೇ ವಿ॑ಭಾವ॒ರಿ॒ ದಿ॒ವೋ ಅ॑ಭ್ರಸ್ಯ॒ ವಿದ್ಯು॑ತಃ। ರೋಹಂ॑ತು॒ ಸರ್ವ॑ಬೀ॒ಜಾ॒ನ್ಯ॒ವ ಬ್ರ॑ಹ್ಮ ದ್ವಿ॒ಷೋ ಜ॑ಹಿ॥
ಪದ್ಮ॑ಪ್ರಿಯೇ ಪದ್ಮಿನಿ ಪದ್ಮ॒ಹಸ್ತೇ ಪದ್ಮಾ॑ಲಯೇ ಪದ್ಮದಲಾಯ॑ತಾಕ್ಷಿ। ವಿಶ್ವ॑ಪ್ರಿಯೇ॒ ವಿಷ್ಣು ಮನೋ॑ಽನುಕೂ॒ಲೇ ತ್ವತ್ಪಾ॑ದಪ॒ದ್ಮಂ ಮಯಿ॒ ಸನ್ನಿ॑ಧತ್ಸ್ವ॥
ಯಾ ಸಾ ಪದ್ಮಾ॑ಸನ॒ಸ್ಥಾ ವಿಪುಲಕಟಿತಟೀ ಪದ್ಮ॒ಪತ್ರಾ॑ಯತಾ॒ಕ್ಷೀ। ಗಂಭೀರಾ ವ॑ರ್ತನಾ॒ಭಿಃ ಸ್ತನಭರ ನಮಿತಾ ಶುಭ್ರ ವಸ್ತ್ರೋ॑ತ್ತರೀ॒ಯಾ। ಲಕ್ಷ್ಮೀರ್ದಿ॒ವ್ಯೈರ್ಗಜೇಂದ್ರೈರ್ಮ॒ಣಿಗಣ ಖಚಿತೈಸ್ಸ್ನಾಪಿತಾ ಹೇ॑ಮಕುಂ॒ಭೈಃ। ನಿ॒ತ್ಯಂ ಸಾ ಪ॑ದ್ಮಹ॒ಸ್ತಾ ಮಮ ವಸ॑ತು ಗೃ॒ಹೇ ಸರ್ವ॒ಮಾಂಗಲ್ಯ॑ಯುಕ್ತಾ॥
ಲ॒ಕ್ಷ್ಮೀಂ ಕ್ಷೀರಸಮುದ್ರ ರಾಜತನಯಾಂ ಶ್ರೀ॒ರಂಗಧಾಮೇ॑ಶ್ವರೀಂ। ದಾ॒ಸೀಭೂತಸಮಸ್ತ ದೇವ ವ॒ನಿತಾಂ ಲೋ॒ಕೈಕ॒ ದೀಪಾಂ॑ಕುರಾಂ। ಶ್ರೀಮನ್ಮಂದಕಟಾಕ್ಷಲಬ್ಧ ವಿಭವ ಬ್ರ॒ಹ್ಮೇಂದ್ರಗಂಗಾ॑ಧರಾಂ। ತ್ವಾಂ ತ್ರೈ॒ಲೋಕ್ಯ॒ ಕುಟುಂ॑ಬಿನೀಂ ಸ॒ರಸಿಜಾಂ ವಂದೇ॒ ಮುಕುಂ॑ದಪ್ರಿಯಾಂ॥
ಸಿ॒ದ್ಧ॒ಲ॒ಕ್ಷ್ಮೀರ್ಮೋ॑ಕ್ಷಲ॒ಕ್ಷ್ಮೀ॒ರ್ಜ॒ಯಲ॑ಕ್ಷ್ಮೀಸ್ಸ॒ರಸ್ವ॑ತೀ। ಶ್ರೀಲಕ್ಷ್ಮೀರ್ವ॑ರಲ॒ಕ್ಷ್ಮೀ॒ಶ್ಚ॒ ಪ್ರ॒ಸನ್ನಾ ಮ॑ಮ ಸ॒ರ್ವದಾ॥
ವರಾಂಕುಶೌ ಪಾಶಮಭೀ॑ತಿಮು॒ದ್ರಾಂ॒ ಕ॒ರೈರ್ವಹಂತೀಂ ಕ॑ಮಲಾ॒ಸನಸ್ಥಾಂ। ಬಾಲಾರ್ಕ ಕೋಟಿ ಪ್ರತಿ॑ಭಾಂ ತ್ರಿ॒ಣೇ॒ತ್ರಾಂ॒ ಭ॒ಜೇಹಮಾದ್ಯಾಂ ಜ॑ಗದೀ॒ಶ್ವರೀಂ ತಾಂ॥
ಸ॒ರ್ವ॒ಮಂ॒ಗ॒ಲಮಾಂ॒ಗಲ್ಯೇ॑ ಶಿ॒ವೇ ಸ॒ರ್ವಾರ್ಥ॑ ಸಾಧಿಕೇ। ಶರ॑ಣ್ಯೇ ತ್ರ್ಯಂಬ॑ಕೇ ದೇ॒ವಿ॒ ನಾ॒ರಾಯ॑ಣಿ ನ॒ಮೋಽಸ್ತು॑ ತೇ॥
ಸರಸಿಜನಿಲಯೇ ಸರೋ॑ಜಹ॒ಸ್ತೇ ಧವಲತರಾಂಶುಕ ಗಂಧಮಾ᳚ಲ್ಯಶೋ॒ಭೇ। ಭಗವತಿ ಹರಿವಲ್ಲಭೇ॑ ಮನೋ॒ಜ್ಞೇ ತ್ರಿಭುವನಭೂತಿಕರಿಪ್ರ॑ಸೀದ ಮ॒ಹ್ಯಂ॥
ವಿಷ್ಣು॑ಪ॒ತ್ನೀಂ ಕ್ಷ॑ಮಾಂ ದೇ॒ವೀಂ॒ ಮಾ॒ಧವೀಂ᳚ ಮಾಧ॒ವಪ್ರಿ॑ಯಾಂ। ವಿಷ್ಣೋಃ᳚ ಪ್ರಿ॒ಯಸ॑ಖೀಂಂ ದೇ॒ವೀಂ॒ ನ॒ಮಾ॒ಮ್ಯಚ್ಯು॑ತವ॒ಲ್ಲಭಾಂ॥
ಮ॒ಹಾ॒ಲ॒ಕ್ಷ್ಮೀ ಚ॑ ವಿ॒ದ್ಮಹೇ॑ ವಿಷ್ಣುಪ॒ತ್ನೀ ಚ॑ ಧೀಮಹೀ। ತನ್ನೋ॑ ಲಕ್ಷ್ಮೀಃ ಪ್ರಚೋ॒ದಯಾ᳚ತ್॥
ಆನಂ॑ದಃ॒ ಕರ್ದ॑ಮಃ ಶ್ರೀದಶ್ಚಿ॒ಕ್ಲೀತ॑ ಇತಿ॒ ವಿಶ್ರು॑ತಾಃ। ಋಷ॑ಯಃ॒ ಶ್ರಿಯಃ॑ ಪುತ್ರಾ॒ಶ್ಚ ಶ್ರೀ॒ರ್ದೇ॑ವೀರ್ದೇವತಾ॒ ಮ॑ತಾಃ
(ಸ್ವಯಂ ಶ್ರೀರೇವ ದೇವತಾ॥ )
ಚಂದ್ರಭಾಂ ಲಕ್ಷ್ಮೀಮೀಶಾನಾಂ ಸೂರ್ಯಭಾಂ ಶ್ರಿಯಮೀಶ್ವರೀಂ। ಚಂದ್ರ ಸೂರ್ಯಗ್ನಿ ಸರ್ವಾಭಾಂ ಶ್ರೀಮಹಾಲಕ್ಷ್ಮೀಮುಪಾಸ್ಮಹೇ॥
ಶ್ರೀ॒ವರ್ಚ॑ಸ್ಯ॒ಮಾಯು॑ಷ್ಯ॒ಮಾರೋ᳚ಗ್ಯ॒ಮಾವಿ॑ಧಾ॒ತ್ ಪವ॑ಮಾನಂ ಮಹೀ॒ಯತೇ᳚। ಧ॒ನಂ ಧಾ॒ನ್ಯಂ ಪ॒ಶುಂ ಬ॒ಹುಪು॑ತ್ರಲಾ॒ಭಂ ಶ॒ತಸಂ॑ವತ್ಸ॒ರಂ ದೀ॒ರ್ಘಮಾಯುಃ॑॥
ಋಣರೋಗಾದಿದಾರಿದ್ರ್ಯಪಾ॒ಪಕ್ಷು॑ದ॒ಪಮೃತ್ಯ॑ವಃ। ಭಯ॑ಶೋ॒ಕಮ॑ನಸ್ತಾ॒ಪಾ ನ॒ಶ್ಯಂತು॑ ಮಮ॒ ಸರ್ವ॑ದಾ॥
ಶ್ರಿಯೇ॑ ಜಾ॒ತ ಶ್ರಿಯ॒ ಆನಿ॑ರ್ಯಾಯ॒ ಶ್ರಿಯಂ॒ ವಯೋ᳚ ಜನಿ॒ತೃಭ್ಯೋ᳚ ದಧಾತು। ಶ್ರಿಯಂ॒ ವಸಾ᳚ನಾ ಅಮೃತ॒ತ್ವಮಾ᳚ಯ॒ನ್ ಭಜಂ᳚ತಿ ಸ॒ದ್ಯಃ ಸ॑ವಿ॒ತಾ ವಿ॒ದಧ್ಯೂನ್॑॥
ಶ್ರಿಯ॑ ಏವೈನಂ ತಚ್ಛ್ರಿ॒ಯಾಮಾ॑ದಧಾ॒ತಿ। ಸಂ॒ತ॒ತ॒ಮೃ॒ಚಾ ವ॑ಷಟ್ಕೃ॒ತ್ಯಂ ಸಂಧ॑ತ್ತಂ॒ ಸಂಧೀ॑ಯತೇ ಪ್ರಜ॒ಯಾ ಪ॒ಶುಭಿಃ। ಯ ಏ॑ವಂ ವೇ॒ದ।
ಓಂ ಮ॒ಹಾ॒ದೇ॒ವ್ಯೈ ಚ॑ ವಿ॒ದ್ಮಹೇ॑ ವಿಷ್ಣುಪ॒ತ್ನೀ ಚ॑ ಧೀಮಹಿ। ತನ್ನೋ॑ ಲಕ್ಷ್ಮೀಃ ಪ್ರಚೋ॒ದಯಾ᳚ತ್॥
ಓಂ ಶಾಂತಿಃ॒ ಶಾಂತಿಃ॒ ಶಾಂತಿಃ॑॥