[ತೈತ್ತಿರೀಯ ಬ್ರಾಹ್ಮಣಂ 2.3.11]
ಬ್ರಹ್ಮಾ᳚ತ್ಮ॒ನ್ವದ॑ಸೃಜತ। ತದ॑ಕಾಮಯತ। ಸಮಾ॒ತ್ಮನಾ॑ ಪದ್ಯೇ॒ಯೇತಿ॑।
ಆತ್ಮ॒ನ್ನಾತ್ಮ॒ನ್ನಿತ್ಯಾಮಂ॑ತ್ರಯತ। ತಸ್ಮೈ॑ ದಶ॒ಮಗ್ಂ ಹೂ॒ತಃ ಪ್ರತ್ಯ॑ಶೃಣೋತ್। ಸ ದಶ॑ಹೂತೋಽಭವತ್। ದಶ॑ಹೂತೋ ಹ॒ ವೈ ನಾಮೈ॒ಷಃ। ತಂ ವಾ ಏ॒ತಂ ದಶ॑ಹೂತ॒ಗ್ಂ॒ ಸಂತಂ᳚। ದಶ॑ಹೋ॒ತೇತ್ಯಾಚ॑ಕ್ಷತೇ ಪ॒ರೋಕ್ಷೇ॑ಣ। ಪ॒ರೋಕ್ಷ॑ಪ್ರಿಯಾ ಇವ॒ ಹಿ ದೇ॒ವಾಃ॥
ಆತ್ಮ॒ನ್ನಾತ್ಮ॒ನ್ನಿತ್ಯಾಮಂ॑ತ್ರಯತ। ತಸ್ಮೈ॑ ಸಪ್ತ॒ಮಗ್ಂ ಹೂ॒ತಃ ಪ್ರತ್ಯ॑ಶೃಣೋತ್। ಸ ಸ॒ಪ್ತಹೂ॑ತೋಽಭವತ್। ಸ॒ಪ್ತಹೂ॑ತೋ ಹ॒ ವೈ ನಾಮೈ॒ಷಃ। ತಂ ವಾ ಏ॒ತಗ್ಂ ಸ॒ಪ್ತಹೂ॑ತ॒ಗ್ಂ॒ ಸಂತಂ᳚। ಸ॒ಪ್ತಹೋ॒ತೇತ್ಯಾಚ॑ಕ್ಷತೇ ಪ॒ರೋಕ್ಷೇ॑ಣ। ಪ॒ರೋಕ್ಷ॑ಪ್ರಿಯಾ ಇವ॒ ಹಿ ದೇ॒ವಾಃ॥
ಆತ್ಮ॒ನ್ನಾತ್ಮ॒ನ್ನಿತ್ಯಾಮಂ॑ತ್ರಯತ। ತಸ್ಮೈ॑ ಷ॒ಷ್ಠಗ್ಂ ಹೂ॒ತಃ ಪ್ರತ್ಯ॑ಶೃಣೋತ್। ಸ ಷಡ್ಢೂ॑ತೋಽಭವತ್। ಷಡ್ಢೂ॑ತೋ ಹ॒ ವೈ ನಾಮೈ॒ಷಃ। ತಂ ವಾ ಏ॒ತಗ್ಂ ಷಡ್ಢೂ॑ತ॒ಗ್ಂ॒ ಸಂತಂ᳚। ಷಡ್ಢೋ॒ತೇತ್ಯಾಚ॑ಕ್ಷತೇ ಪ॒ರೋಕ್ಷೇ॑ಣ। ಪ॒ರೋಕ್ಷ॑ಪ್ರಿಯಾ ಇವ॒ ಹಿ ದೇ॒ವಾಃ॥
ಆತ್ಮ॒ನ್ನಾತ್ಮ॒ನ್ನಿತ್ಯಾಮಂ॑ತ್ರಯತ। ತಸ್ಮೈ॑ ಪಂಚ॒ಮಗ್ಂ ಹೂ॒ತಃ ಪ್ರತ್ಯ॑ಶೃಣೋತ್। ಸ ಪಂಚ॑ಹೂತೋಽಭವತ್। ಪಂಚ॑ಹೂತೋ ಹ॒ ವೈ ನಾಮೈ॒ಷಃ। ತಂ ವಾ ಏ॒ತಂ ಪಂಚ॑ಹೂತ॒ಗ್ಂ॒ ಸಂತಂ᳚। ಪಂಚ॑ಹೋ॒ತೇತ್ಯಾಚ॑ಕ್ಷತೇ ಪ॒ರೋಕ್ಷೇ॑ಣ॥ ಪ॒ರೋಕ್ಷ॑ಪ್ರಿಯಾ ಇವ॒ ಹಿ ದೇ॒ವಾಃ॥
ಆತ್ಮ॒ನ್ನಾತ್ಮ॒ನ್ನಿತ್ಯಾಮಂ॑ತ್ರಯತ। ತಸ್ಮೈ॑ ಚತು॒ರ್ಥಗ್ಂ ಹೂ॒ತಃ ಪ್ರತ್ಯ॑ಶೃಣೋತ್। ಸ ಚತು॑ರ್ಹೂತೋಽಭವತ್। ಚತು॑ರ್ಹೂತೋ ಹ॒ ವೈ ನಾಮೈ॒ಷಃ। ತಂ ವಾ ಏ॒ತಂ ಚತು॑ರ್ಹೂತ॒ಗ್ಂ॒ ಸಂತಂ᳚। ಚತು॑ರ್ಹೋ॒ತೇತ್ಯಾಚ॑ಕ್ಷತೇ ಪ॒ರೋಕ್ಷೇ॑ಣ। ಪ॒ರೋಕ್ಷ॑ಪ್ರಿಯಾ ಇವ॒ ಹಿ ದೇ॒ವಾಃ॥
ತಮ॑ಬ್ರವೀತ್। ತ್ವಂ ವೈ ಮೇ॒ ನೇದಿ॑ಷ್ಠಗ್ಂ ಹೂ॒ತಃ ಪ್ರತ್ಯ॑ಶ್ರೌಷೀಃ। ತ್ವಯೈ॑ನಾನಾಖ್ಯಾ॒ತಾರ॒ ಇತಿ॑। ತಸ್ಮಾ॒ನ್ನು ಹೈ॑ನಾ॒ಗ್॒ಶ್ಚತು॑ರ್ಹೋತಾರ॒ ಇತ್ಯಾಚ॑ಕ್ಷತೇ। ತಸ್ಮಾ᳚ಚ್ಛುಶ್ರೂ॒ಷುಃ ಪು॒ತ್ರಾಣಾ॒ಗ್ಂ॒ ಹೃದ್ಯ॑ತಮಃ। ನೇದಿ॑ಷ್ಠೋ॒ ಹೃದ್ಯ॑ತಮಃ। ನೇದಿ॑ಷ್ಠೋ॒ ಬ್ರಹ್ಮ॑ಣೋ ಭವತಿ॥
ಯ ಏ॒ವಂ ವೇದ॑॥