ಧ್ಯಾನಮ್
ಓಂ ಅಥಾತ್ಮಾನಗ್ಂ ಶಿವಾತ್ಮಾನಗ್ಂ ಶ್ರೀ ರುದ್ರರೂಪಂ ಧ್ಯಾಯೇತ್॥
ಶುದ್ಧಸ್ಫಟಿಕ ಸಂಕಾಶಂ ತ್ರಿನೇತ್ರಂ ಪಂಚ ವಕ್ತ್ರಕಮ್। ಗಂಗಾಧರಂ ದಶಭುಜಗ್ಂ ಸರ್ವಾಭರಣ ಭೂಷಿತಮ್॥
ನೀಲಗ್ರೀವಂ ಶಶಾಂಕಾಂಕಂ ನಾಗ ಯಜ್ಞೋಪ ವೀತಿನಮ್। ನಾಗಾಭರಣಭೂಷಿತಂ ವ್ಯಾಘ್ರಚರ್ಮೋತ್ತರೀಯಕಮ್॥
ಕಮಂಡಲ್ವಕ್ಷ-ಸೂತ್ರಧರಂ ಅಭಯವರ ಕರಗ್ಂ ಶೂಲಹಸ್ತಮ್। ಜ್ವಲಂತಂ ಕಪಿಲ ಜಟಿನಗ್ಂ ಶಿಖಾಮಧ್ಯೋದದಾರಿಣಮ್॥
ವೃಷ ಸ್ಕಂಧ ಸಮಾರೂಢಂ ಉಮಾ ದೇಹಾರ್ಥ ಧಾರಿಣಮ್। ಅಮೃತೇನಾಪ್ಲುತಂ ಹೃಷ್ಟಂ ದಿವ್ಯಭೋಗ ಸಮನ್ವಿತಮ್॥
ದಿಗ್ದೇವತಾ ಸಮಾಯುಕ್ತಂ ಸುರಾಸುರ ನಮಸ್ಕೃತಮ್। ನಿತ್ಯಂ ಚ ಶಾಶ್ವತಂ ಶುದ್ಧಂ ಧ್ರುವ-ಮಕ್ಷರ-ಮವ್ಯಯಮ್॥
ಸರ್ವ ವ್ಯಾಪಿನಮೀಶಾನಂ ರುದ್ರಂ ವೈ ವಿಶ್ವರೂಪಿಣಮ್। ಏವಂ ಧ್ಯಾತ್ವಾ ದ್ವಿಜಸ್ಸಮ್ಯಕ್ತತೋಯಜನಮಾರಭೇತ್॥
ಅಗ್ನಿಕಾಂಡ ಋಷಿಃ। ಅಘೋರಘೋರಾಶ್ಚೇತಿ ಬೀಜಶಕ್ತಯಃ। ಚಕಾರಶ್ಚೇತಿ ಕೀಲಕಮ್। ಶ್ರೀ ರುದ್ರೋ ದೇವತಾ। ರುದ್ರಪ್ರೀತ್ಯರ್ಥೇ ನ್ಯಾಸೇ ವಿನಿಯೋಗಃ॥
ಅಥೋತೋ ರುದ್ರ ಸ್ನಾನಾಭಿಷೇಕವಿಧಿಂ ವ್ಯಾಖ್ಯಾಸ್ಯಾಮಃ॥
ಉದಿತ ಏವ ತೀರ್ಥೇ ಸ್ನಾತ್ವೋದೇತ್ಯ ಶುಚಿಃ ಪ್ರಯತೋ ಬ್ರಹ್ಮಚಾರೀ ಶುಕ್ಲವಾಸಾಃ ತಸ್ಯಾ ದಕ್ಷಿಣಾ ಪ್ರತ್ಯಗ್ದೇಶೇ ತನ್ಮುಖಂ ಸ್ಥಿತ್ವಾ ಆತ್ಮನಿ ದೇವತಾಃ ಸ್ಥಾಪಯೇತ್॥
ಆತ್ಮನಿ ದೇವತಾ ಸ್ಥಾಪನಂ
ಅಥಾತ್ಮನಿ ದೇವತಾಸ್ಸ್ಥಾಪಯೇತ್॥
ಪ್ರಜನನೇ ಬ್ರಹ್ಮಾ ತಿಷ್ಠತು। ಪಾದಯೋರ್ವಿಷ್ಣುಸ್ತಿಷ್ಠತು। ಹಸ್ತಯೋರ್ಹರಸ್ತಿಷ್ಠತು। ಬಾಹ್ವೋರ್ಇಂದ್ರಸ್ತಿಷ್ಟತು। ಜಠರೇಽಅಗ್ನಿಸ್ತಿಷ್ಠತು। ಹೃದ॑ಯೇ ಶಿವಸ್ತಿಷ್ಠತು। ಕಂಠೇ ವಸವಸ್ತಿಷ್ಠಂತು। ವಕ್ತ್ರೇ ಸರಸ್ವತೀ ತಿಷ್ಠತು। ನಾಸಿಕಯೋರ್ವಾಯುಸ್ತಿಷ್ಠತು। ನಯನಯೋಶ್ಚಂದ್ರಾದಿತ್ಯೌ ತಿಷ್ಟೇತಾಮ್। ಕರ್ಣಯೋರ್ಅಶ್ವಿನೌ ತಿಷ್ಟೇತಾಮ್। ಲಲಾಟೇ ರುದ್ರಾಸ್ತಿಷ್ಠಂತು। ಮೂರ್ಧ್ನ್ಯಾದಿತ್ಯಾಸ್ತಿಷ್ಠಂತು। ಶಿರಸಿ ಮಹಾದೇವಸ್ತಿಷ್ಠತು। ಶಿಖಾಯಾಂ ವಾಁಮದೇವಾಸ್ತಿಷ್ಠತು। ಪೃಷ್ಠೇ ಪಿನಾಕೀ ತಿಷ್ಠತು। ಪುರತಃ ಶೂಲೀ ತಿಷ್ಠತು। ಪಾರ್ಶ್ವಯೋಃ ಶಿವಾಶಂಕರೌ ತಿಷ್ಠೇತಾಮ್। ಸರ್ವತೋ ವಾಯುಸ್ತಿಷ್ಠತು। ತತೋ ಬಹಿಃ ಸರ್ವತೋಽಗ್ನಿರ್ಜ್ವಾಲಾಮಾಲಾ-ಪರಿವೃತಾಸ್ತಿಷ್ಠಂತು। ಸರ್ವೇಷ್ವಂಗೇಷು ಸರ್ವಾ ದೇವತಾ ಯಥಾಸ್ಥಾನಂ ತಿಷ್ಠಂತು। ಮಾಂ ರಕ್ಷಂತು। ಯಜಮಾನಂ ರಕ್ಷಂತು॥
ಅ॒ಗ್ನಿರ್ಮೇ॑ ವಾ॒ಚಿ ಶ್ರಿ॒ತಃ। ವಾಘೃದ॑ಯೇ। ಹೃದ॑ಯಂ॒ ಮಯಿ॑। ಅ॒ಹಮ॒ಮೃತೇ᳚। ಅ॒ಮೃತಂ॒ ಬ್ರಹ್ಮ॑ಣಿ। ವಾ॒ಯುರ್ಮೇ᳚ ಪ್ರಾ॒ಣೇ ಶ್ರಿ॒ತಃ। ಪ್ರಾ॒ಣೋ ಹೃದ॑ಯೇ। ಹೃದ॑ಯಂ॒ ಮಯಿ॑। ಅ॒ಹಮ॒ಮೃತೇ᳚। ಅ॒ಮೃತಂ॒ ಬ್ರಹ್ಮ॑ಣಿ। ಸೂರ್ಯೋ॑ ಮೇ॒ ಚಕ್ಷುಷಿ ಶ್ರಿ॒ತಃ। ಚಕ್ಷು॒ರ್ಹೃದ॑ಯೇ। ಹೃದ॑ಯಂ॒ ಮಯಿ॑। ಅ॒ಹಮ॒ಮೃತೇ᳚। ಅ॒ಮೃತಂ॒ ಬ್ರಹ್ಮ॑ಣಿ। ಚಂ॒ದ್ರಮಾ॑ ಮೇ॒ ಮನ॑ಸಿ ಶ್ರಿ॒ತಃ। ಮನೋ॒ ಹೃದ॑ಯೇ। ಹೃದ॑ಯಂ॒ ಮಯಿ॑। ಅ॒ಹಮ॒ಮೃತೇ᳚। ಅ॒ಮೃತಂ॒ ಬ್ರಹ್ಮ॑ಣಿ। ದಿಶೋ॑ ಮೇ॒ ಶ್ರೋತ್ರೇ᳚ ಶ್ರಿ॒ತಾಃ। ಶ್ರೋತ್ರ॒ಗ್ಂ॒ ಹೃದ॑ಯೇ। ಹೃದ॑ಯಂ॒ ಮಯಿ॑। ಅ॒ಹಮ॒ಮೃತೇ᳚। ಅ॒ಮೃತಂ॒ ಬ್ರಹ್ಮ॑ಣಿ। ಆಪೋಮೇ॒ ರೇತಸಿ ಶ್ರಿ॒ತಾಃ। ರೇತೋ ಹೃದ॑ಯೇ। ಹೃದ॑ಯಂ॒ ಮಯಿ॑। ಅ॒ಹಮ॒ಮೃತೇ᳚। ಅ॒ಮೃತಂ॒ ಬ್ರಹ್ಮ॑ಣಿ। ಪೃ॒ಥಿ॒ವೀ ಮೇ॒ ಶರೀ॑ರೇ ಶ್ರಿ॒ತಾ। ಶರೀ॑ರ॒ಗ್ಂ॒ ಹೃದ॑ಯೇ। ಹೃದ॑ಯಂ॒ ಮಯಿ॑। ಅ॒ಹಮ॒ಮೃತೇ᳚। ಅ॒ಮೃತಂ॒ ಬ್ರಹ್ಮ॑ಣಿ। ಓ॒ಷ॒ಧಿ॒ ವ॒ನ॒ಸ್ಪತಯೋ॑ ಮೇ॒ ಲೋಮ॑ಸು ಶ್ರಿ॒ತಾಃ। ಲೋಮಾ॑ನಿ॒ ಹೃದ॑ಯೇ। ಹೃದ॑ಯಂ॒ ಮಯಿ॑। ಅ॒ಹಮ॒ಮೃತೇ᳚। ಅ॒ಮೃತಂ॒ ಬ್ರಹ್ಮ॑ಣಿ। ಇಂದ್ರೋ॑ ಮೇ॒ ಬಲೇ᳚ ಶ್ರಿ॒ತಃ। ಬಲ॒ಗ್ಂ॒ ಹೃದ॑ಯೇ। ಹೃದ॑ಯಂ॒ ಮಯಿ॑। ಅ॒ಹಮ॒ಮೃತೇ᳚। ಅ॒ಮೃತಂ॒ ಬ್ರಹ್ಮ॑ಣಿ। ಪ॒ರ್ಜನ್ಯೋ॑ ಮೇ॒ ಮೂ॒ರ್ದ್ನಿ ಶ್ರಿ॒ತಃ। ಮೂ॒ರ್ಧಾ ಹೃದ॑ಯೇ। ಹೃದ॑ಯಂ॒ ಮಯಿ॑। ಅ॒ಹಮ॒ಮೃತೇ᳚। ಅ॒ಮೃತಂ॒ ಬ್ರಹ್ಮ॑ಣಿ। ಈಶಾ॑ನೋ ಮೇ॒ ಮ॒ನ್ಯೌ ಶ್ರಿ॒ತಃ। ಮ॒ನ್ಯುರ್ಹೃದ॑ಯೇ। ಹೃದ॑ಯಂ॒ ಮಯಿ॑। ಅ॒ಹಮ॒ಮೃತೇ᳚। ಅ॒ಮೃತಂ॒ ಬ್ರಹ್ಮ॑ಣಿ। ಆ॒ತ್ಮಾ ಮ॑ ಆ॒ತ್ಮನಿ॑ ಶ್ರಿ॒ತಃ। ಆ॒ತ್ಮಾ ಹೃದ॑ಯೇ। ಹೃದ॑ಯಂ॒ ಮಯಿ॑। ಅ॒ಹಮ॒ಮೃತೇ᳚। ಅ॒ಮೃತಂ॒ ಬ್ರಹ್ಮ॑ಣಿ। ಪುನ॑ರ್ಮ ಆ॒ತ್ಮಾ ಪುನ॒ರಾಯು॒ ರಾಗಾ᳚ತ್। ಪುನಃ॑ ಪ್ರಾ॒ಣಃ ಪುನ॒ರಾಕೂ॑ತ॒ಮಾಗಾ᳚ತ್। ವೈ॒ಶ್ವಾ॒ನ॒ರೋ ರ॒ಶ್ಮಿಭಿ॑ರ್ವಾವೃಧಾ॒ನಃ। ಅಂ॒ತಸ್ತಿ॑ಷ್ಠ॒ತ್ವಮೃತ॑ಸ್ಯ ಗೋ॒ಪಾಃ॥
ಏವಂ ಯಥಾಲಿಂಗಮಂಗಾನಿ ಸಂಮೃಜ್ಯ। ದೇವಮಾತ್ಮಾನಂ ಚ ಪ್ರತ್ಯಾರಾಧಯೇತ್ ॥
ಆರಾಧಿತೋ ಮನುಷ್ಯೈಸ್ತ್ವಂ ಸಿದ್ಧೈರ್ದೇವಾಸುರಾದಿಭಿಃ। ಆರಾಧಯಾಮಿ ಭಕ್ತ್ಯಾತ್ವಾಂ ಮಾಂ ಗೃಹಾಣ ಮಹೇಶ್ವರ॥
ಆತ್ವಾ॑ ವಹಂತು॒ ಹರ॑ಯಃ॒ ಸಚೇ॑ತಸಃ ಶ್ವೇ॒ತೈರಶ್ವೈಃ᳚ ಸ॒ಹ ಕೇ॑ತು॒ಮದ್ಭಿಃ॑। ವಾತಾ॑ಜಿರೈ॒ರ್ಬಲ॑ವದ್ಭಿ॒ರ್ಮನೋ॑ಜವೈ॒ರಾಯಾ॑ಹಿ। ಶೀ॒ಘ್ರಂ ಮಮ॑ ಹ॒ವ್ಯಾಯ॑ ಶ॒ರ್ವೋಮ್। ಈಶಾನಮಾವಾಹಯಾಮೀತ್ಯಾವಾಹ್ಯ॥ ಸ್ಥಾಪಿತೇನಾಽಽವಾಹನಮ್॥ ಉತ್ತರತಶಚಂಡೀಶ್ವರಾಯ ನಮಃ। ಭೂರ್ಭುವಸ್ಸುಃ ಇತಿ ನಿರ್ಮಾಲ್ಯಂ ವಿಸೃಜ್ಯ॥
ಸ್ವಾಮಿನ್ ಸರ್ವಜಗನ್ನಾಥ ಯಾವತ್ಪೂಜಾಽವಸಾನಕಮ್। ತಾವತ್ತ್ವಂ ಪ್ರೀತಿಭಾವೇನ ಲಿಂಗೇಽಸ್ಮಿನ್ ಸನ್ನಿಧಿಂ ಕುರು॥
ಆವಾಹಿತೋ ಭವ। ಸ್ಥಾಪಿತೋ ಭವ। ಸಂಮುಖೋ ಭವ। ಸನ್ನಿಹಿತೋ ಭವ। ಸನ್ನಿರುದ್ಧೋ ಭವ। ಅವಕುಂಠಿತೋ ಭವ। ಪ್ರಸೀದ ಪ್ರಸೀದ॥
ಓಂ ನಮ॑ಸ್ತೇ ರುದ್ರ ಮ॒ನ್ಯವ॑ ಉ॒ತೋತ॒ ಇಷ॑ವೇ॒ ನಮಃ॑। ನಮ॑ಸ್ತೇ. ಅಸ್ತು॒ ಧನ್ವ॑ನೇ ಬಾ॒ಹುಭ್ಯಾ॑ಮು॒ತತೇ॒ ನಮಃ॑।
ಸ॒ದ್ಯೋಜಾ॒ತಂ ಪ್ರ॑ಪದ್ಯಾ॒ಮೀತ್ಯಾಸನಂ ಸಮರ್ಪಯಾಮಿ।
ಸ॒ದ್ಯೋಜಾ॒ತಾಯ॒ ವೈ ನಮೋ॒ ನಮ॑ ಇತ್ಯಾವಾಹಯಾಮಿ।
ಭ॒ವೇ ಭ॑ವೇ॒ ನಾತಿ॑ಭವೇ ಭವಸ್ವ॒ಮಾಮಿತಿ ಪಾದ್ಯಮ್।
ಭ॒ವೋದ್ಭ॑ವಾಯ॒ ನಮ॑ ಇತ್ಯರ್ಘ್ಯಮ್।
ವಾ॒ಮ॒ದೇ॒ವಾಯ॒ ನಮ॑ ಇತಿ ಸ್ನಾನಮ್।
ಜ್ಯೇ॒ಷ್ಠಾಯ॒ ನಮ॑ ಇತಿ ವಸ್ತ್ರಮ್।
ಶ್ರೇ॒ಷ್ಠಾಯ॒ ನಮ॑ ಇತಿ ಉಪವೀತಮ್।
ರು॒ದ್ರಾಯ॒ ನಮ॑ ಇತ್ಯಾಭರಣಮ್।
ಕಾಲಾ॑ಯ॒ ನಮ॑ ಇತಿ ಗಂಧಮ್।
ಕಲ॑ವಿಕರಣಾಯ॒ ನಮ॑ ಇತಿ ತಿಲಾಕ್ಷತಾನ್।
ಬಲ॑ವಿಕರಣಾಯ॒ ನಮ॑ ಇತಿ ಬಿಲ್ವಪತ್ರಮ್।
ಬಲಾ॑ಯ॒ ನಮ॑ ಇತಿ ಧೂಪಮಾಘ್ರಾಪಯಾಮಿ।
ಬಲ॑ಪ್ರಮಥನಾಯ॒ ನಮ॑ ಇತಿ ದೀಪಂ ದರ್ಶಯಾಮಿ।
ಸರ್ವ॑ಭೂತದಮನಾಯ॒ ನಮ॑ ಇತಿ ಕಾಲೇ ನೈವೇದ್ಯಂ ಸಮರ್ಪಯಾಮಿ।
ಮ॒ನೋನ್ಮ॑ನಾಯ॒ ನಮ॑ ಇತಿ ತಾಂಬೂಲಮ್।
ಅ॒ಘೋರೇ᳚ಭ್ಯೋಽಥ॒ ಘೋರೇ᳚ಭ್ಯ ಇತ್ಯುತ್ತರ ನೀರಾಜನಮ್।
ತತ್ಪುರು॑ಷಾಯ ವಿ॒ದ್ಮಹ॑ ಇತಿ ಮಂತ್ರಪುಷ್ಪಮ್।
ಈಶಾನೋ ನಮೋ ಹಿರಣ್ಯಬಾಹವ ಇತಿ ಪ್ರದಕ್ಷಿಣನಮಸ್ಕಾರಾನ್॥
ಪುಷ್ಪ ಪೂಜಾ
ಅಥಾಸ್ಯಾಷ್ಟಭಿರ್ಮಂತ್ರೈರಷ್ಟೌ ಪುಷ್ಪಾಣಿ ದದಾತಿ। ಅರ್ಕ ಚಂಪಕ ಪುನ್ನಾಗ ನಂದ್ಯಾವರ್ತೈಶ್ಚ ಪಾಟಲೈಃ। ಬೃಹತೀ ಕರವೀರಶ್ಚ ದ್ರೋಣ ಪುಷ್ಪೈಃ ಪ್ರಪೂಜಯೇತ್॥
ಭ॒ವಾಯ॑ ದೇ॒ವಾಯ॒ ನಮಃ॑। ಅರ್ಕಪುಷ್ಪಂ ಪೂಜಯಾಮಿ।
ಶ॒ರ್ವಾಯ॑ ದೇ॒ವಾಯ॒ ನಮಃ॑। ಚಂಪಕಪುಷ್ಪಂ ಪೂಜಯಾಮಿ।
ಈಶಾ॑ನಾಯ ದೇ॒ವಾಯ॒ ನಮಃ॑। ಪುನ್ನಾಗಪುಷ್ಪಂ ಪೂಜಯಾಮಿ।
ಪ॒ಶು॒ಪತ॑ಯೇ ದೇ॒ವಾಯ॒ ನಮಃ॑। ನಂದ್ಯಾವರ್ತಪುಷ್ಪಂ ಪೂಜಯಾಮಿ।
ರು॒ದ್ರಾಯ॑ ದೇ॒ವಾಯ॒ ನಮಃ॑। ಪಾಟಲಪುಷ್ಪಂ ಪೂಜಯಾಮಿ।
ಉ॒ಗ್ರಾಯ॑ ದೇ॒ವಾಯ॒ ನಮಃ॑। ಬೃಹತೀಪುಷ್ಪಂ ಪೂಜಯಾಮಿ।
ಭೀ॒ಮಾಯ॑ ದೇ॒ವಾಯ॒ ನಮಃ॑। ಕರವೀರಪುಷ್ಪಂ ಪೂಜಯಾಮಿ।
ಮ॒ಹ॒ತೇ ದೇ॒ವಾಯ॒ ನಮಃ॑। ದ್ರೋಣಪುಷ್ಪಂ ಪೂಜಯಾಮಿ।
ಭವಸ್ಯ॑ ದೇ॒ವಸ್ಯ॒ ಪತ್ನೈ ನಮಃ॑। ಅರ್ಕಪುಷ್ಪಂ ಪೂಜಯಾಮಿ।
ಶ॒ರ್ವಸ್ಯ॑ ದೇ॒ವಸ್ಯ॒ ಪತ್ನೈ ನಮಃ॑। ಚಂಪಕಪುಷ್ಪಂ ಪೂಜಯಾಮಿ।
ಈಶಾ॑ನಸ್ಯ ದೇ॒ವಸ್ಯ॒ ಪತ್ನೈ ನಮಃ॑। ಪುನ್ನಾಗಪುಷ್ಪಂ ಪೂಜಯಾಮಿ।
ಪಶು॒ಪತೇ᳚ರ್ದೇ॒ವಸ್ಯ॒ ದೇವಸ್ಯ ಪತ್ನೈ ನಮಃ॑। ನಂದ್ಯಾವರ್ತಪುಷ್ಪಂ ಪೂಜಯಾಮಿ।
ರು॒ದ್ರಸ್ಯ॑ ದೇ॒ವಸ್ಯ॒ ಪತ್ನೈ ನಮಃ॑। ಪಾಟಲಪುಷ್ಪಂ ಪೂಜಯಾಮಿ।
ಉ॒ಗ್ರಸ್ಯ॑ ದೇ॒ವಸ್ಯ॒ ಪತ್ನೈ ನಮಃ॑। ಬೃಹತೀಪುಷ್ಪಂ ಪೂಜಯಾಮಿ।
ಭೀ॒ಮಸ್ಯ॑ ದೇ॒ವಸ್ಯ॒ ಪತ್ನೈ ನಮಃ॑। ಕರವೀರಪುಷ್ಪಂ ಪೂಜಯಾಮಿ।
ಮ॒ಹ॒ತೋ ದೇ॒ವಸ್ಯ॒ ದೇವಸ್ಯ ಪತ್ನೈ ನಮಃ॑। ದ್ರೋಣಪುಷ್ಪಂ ಪೂಜಯಾಮಿ।
ತರ್ಪಣಮ್
ಭವಂ ದೇವಂ ತರ್ಪಯಾಮಿ। ಶರ್ವಂ ದೇವಂ ತರ್ಪಯಾಮಿ। ಈಶಾನಂ ದೇವಂ ತರ್ಪಯಾಮಿ। ಪಶುಪತಿಂ ದೇವಂ ತರ್ಪಯಾಮಿ। ರುದ್ರಂ ದೇವಂ ತರ್ಪಯಾಮಿ। ಉಗ್ರಂ ದೇವಂ ತರ್ಪಯಾಮಿ। ಭೀಮಂ ದೇವಂ ತರ್ಪಯಾಮಿ। ಮಹಾಂತಂ ದೇವಂ ತರ್ಪಯಾಮಿ।
ಭವಸ್ಯ ದೇವಸ್ಯ ಪತ್ನೀಸ್ತರ್ಪಯಾಮಿ ತರ್ಪಯಾಮಿ। ಶರ್ವಸ್ಯ ದೇವಸ್ಯ ಪತ್ನೀಸ್ತರ್ಪಯಾಮಿ ತರ್ಪಯಾಮಿ। ಈಶಾನಸ್ಯ ದೇವಸ್ಯ ಪತ್ನೀಸ್ತರ್ಪಯಾಮಿ ತರ್ಪಯಾಮಿ। ಪಶುಪತೇರ್ದೇವಸ್ಯ ದೇವಸ್ಯ ಪತ್ನೀಸ್ತರ್ಪಯಾಮಿ ತರ್ಪಯಾಮಿ। ರುದ್ರಸ್ಯ ದೇವಸ್ಯ ಪತ್ನೀಸ್ತರ್ಪಯಾಮಿ ತರ್ಪಯಾಮಿ। ಉಗ್ರಸ್ಯ ದೇವಸ್ಯ ಪತ್ನೀಸ್ತರ್ಪಯಾಮಿ ತರ್ಪಯಾಮಿ। ಭೀಮಸ್ಯ ದೇವಸ್ಯ ಪತ್ನೀಸ್ತರ್ಪಯಾಮಿ ತರ್ಪಯಾಮಿ। ಮಹತೋ ದೇವಸ್ಯ ಪತ್ನೀಸ್ತರ್ಪಯಾಮಿ ತರ್ಪಯಾಮಿ।
ಅ॒ಘೋರೇ᳚ಭ್ಯೋಽಥ॒ ಘೋರೇ᳚ಭ್ಯೋ॒ ಘೋರ॒ಘೋರ॑ತರೇಭ್ಯಃ। ಸರ್ವೇ᳚ಭ್ಯಃ ಸರ್ವ॒ಶರ್ವೇ᳚ಭ್ಯೋ॒ ನಮ॑ಸ್ತೇ ಅಸ್ತು ರು॒ದ್ರರೂ॑ಪೇಭ್ಯಃ॥ ತತ್ಪುರು॑ಷಾಯ ವಿ॒ದ್ಮಹೇ॑ ಮಹಾದೇ॒ವಾಯ॑ ಧೀಮಹಿ। ತನ್ನೋ॑ ರುದ್ರಃ ಪ್ರಚೋ॒ದಯಾ᳚ತ್॥
ನಿರ್ಮಾಲ್ಯ ವಿಸರ್ಜನ
ದಶಕೃತ್ವಸ್ಶತಕೃತ್ವಃ ಸಹಸ್ರಕೃತ್ವೋಽಪರಿಮಿತಕೃತ್ವೋ ವಾ ದಶವಾರಮಥೈನಮಾಶಿಷಮಾಶಾಸ್ತೇ।
ಆಶಾ᳚ಸ್ತೇ॒ಽಯಂ ಯಜ॑ಮಾನೋ॒ಽಸೌ। ಆಯು॒ರಾಶಾ᳚ಸ್ತೇ। ಸು॒ಪ್ರ॒ಜಾ॒ಸ್ತ್ವಮಾಶಾ᳚ಸ್ತೇ। ಸ॒ಜಾ॒ತ॒ವ॒ನ॒ಸ್ಯಾಮಾಶಾ᳚ಸ್ತೇ। ಉತ್ತ॑ರಾಂ ದೇವಯ॒ಜ್ಯಾಮಾಶಾ᳚ಸ್ತೇ। ಭೂಯೋ॑ ಹವಿ॒ಷ್ಕರ॑ಣ॒ಮಾಶಾ᳚ಸ್ತೇ। ದಿ॒ವ್ಯಂ ಧಾಮಾಶಾ᳚ಸ್ತೇ। ವಿಶ್ವಂ॑ ಪ್ರಿ॒ಯಮಾಶಾ᳚ಸ್ತೇ। ಯದ॒ನೇನ॑ ಹ॒ವಿಷಾಽಽಶಾ᳚ಸ್ತೇ। ತದ॑ಶ್ಯಾ॒ತ್ತದೃ॑ದ್ಧ್ಯಾತ್। ತದ॑ಸ್ಮೈ ದೇ॒ವಾ ರಾ॑ಸಂತಾಂ। ತದ॒ಗ್ನಿರ್ದೇ॒ವೋ ದೇ॒ವೇಭ್ಯೋ॒ ವನ॑ತೇ। ವ॒ಯಮ॒ಗ್ನೇರ್ಮಾನು॑ಷಾಃ। ಇ॒ಷ್ಟಂ ಚ॑ ವೀ॒ತಂ ಚ॑। ಉ॒ಭೇ ಚ॑ ನೋ॒ ದ್ಯಾವಾ॑ಪೃಥಿ॒ವೀ ಅಗ್ಂಹ॑ಸಃ ಸ್ಪಾತಾಂ। ಇ॒ಹ ಗತಿ॑ರ್ವಾ॒ಮಸ್ಯೇ॒ದಂ ಚ॑। ನಮೋ॑ ದೇ॒ವೇಭ್ಯಃ॑॥
ಉತ್ತರತಃ ಚಂಡೀಶ್ವರಾಯ ನಮಃ। ನಿರ್ಮಾಲ್ಯಂ ವಿಸೃಜ್ಯ॥
ಅಥೈತಸ್ಯ ಮೂರ್ಧ್ನೀ ಹಿರಣ್ಯ ಕಲಶೋದಕೇನ ಸಂತತಧಾರಾ ಅಭಿಷಿಂಚನ್ ಪಯಸಾ ಸರ್ಪಿಷಾ ದಧ್ನಾ ಮಧುನಾಚೇಕ್ಷುರಸೇನಾಮ್ರರಸೇನ ನಾರಿಕೇಳಸಲಿಲೇನ ಪುಷ್ಪೋದಕೇನ ಫಲೋದಕೇನ ಗಂಧೋದಕೇನ ಕುಶೋದಕೇನ ಚ ತದಲಭೇ ಶುದ್ಧೋದಕೇನ ವಾ ಆದೌ ಶಂಚಮ ಇತ್ಯನುವಾಕಂ ನಮಸ್ತೇರುದ್ರಮನ್ಯವ ಇತ್ಯಾಕಾದಶಾನುವಾಕಾನ್ ಅಗ್ನಾವಿಷ್ಣೂ ಸಜೋಷಸಾ ಇತ್ಯೇಕಾದಶಾನುವಾಕಾನಾಮೇಕಂ ಚ ಜಪೇತ್। ಸರ್ವೆಷಾಂ ವಾರೇ ವಾರೇ ಪುನರಾರಾಧನಮುತ್ತರಾರಾಧನಂ। ಸದಾ ಗೃಹೀ ಪಾಪಕ್ಷಯಾರ್ಥೀ ವ್ಯಾಧಿನಾಶನಾರ್ಥೀ ಶತ್ರುನಾಶನಾರ್ಥೀ ಜೀವಿತಾರ್ಥೀ ಪುತ್ರಾರ್ಥೀ ಕಾಮ್ಯಾರ್ಥೀ ಚ ಕುರ್ವೀತ। ಶ್ರೀಕಾಮಃ ಶಾಂತಿಕಾಮಃ ಪುಷ್ಟಿಕಾಮಸ್ತುಷ್ಟಿಕಾಮಃ ಪ್ರಜ್ಞಾಕಾಮೋ ಮೇಧಾಕಾಮ ಆಯುಷ್ಯಕಾಮ ಆರೋಗ್ಯಕಾಮೋನ್ನಾದ್ಯಕಾಮೋ ವಾ। ಏವಂ ಕುರ್ವನ್ನಾ ಚಾರ್ಯಾಯ ದಕ್ಷಿಣಾಂ ದದ್ಯಾದ್ದಶಗಾವಸ್ಸವತ್ಸಾಸ್ಸಪಯಸಸ್ಸ್ವರ್ಣಶೃಂಗೀ ರೌಪ್ಯ ಖುರಾ ಮೌಕ್ತಿಕವಾಲಾಃ। ತದಭಾವ ಏಕಾಂ ಗಾಂ ದದ್ಯಾದೇಕಾದಶ ಬ್ರಾಹ್ಮಣಾನ್ ಭೋಜಯೇದಶ್ವಮೇಧಕ್ರತುಸಹಸ್ರಫಲಮವಾಪ್ನೋತೀತ್ಯಾಹ ಭಗವಾನ್ ಬೋಧಾಯನಃ॥
ಏವಂ ಯಃ ಕುರುತೇ ನಿತ್ಯಂ ಸರ್ವಪಾಪೈಃ ಪ್ರಮುಚ್ಛತೇ। ಸರ್ವಾನ್ಕಾಮಾನವಾಪ್ನೋತಿ ಶಿವಸಾಯುಜ್ಯಮಾಪ್ನುಯಾತ್॥
ಮಲಾಪಕರ್ಷಣ ಸ್ನಾನಮ್
ಹಿರ॑ಣ್ಯವರ್ಣಾಃ॒ ಶುಚ॑ಯಃ ಪಾವ॒ಕಾ ಯಾಸು॑ ಜಾ॒ತಃ ಕ॒ಶ್ಯಪೋ॒ ಯಾಸ್ವಿಂದ್ರಃ॑। ಅ॒ಗ್ನಿಂ ಯಾ ಗರ್ಭಂ॑ ದಧಿ॒ರೇ ವಿರೂ॑ಪಾ॒ಸ್ತಾನ॒ ಆಪಃ॒ ಶಗ್ಗ್ ಸ್ಯೋ॒ನಾ ಭ॑ವಂತು॥
ಯಾಸಾ॒ಗ್ಂ॒ ರಾಜಾ॒ ವರು॑ಣೋ॒ ಯಾತಿ॒ ಮಧ್ಯೇ॑ ಸತ್ಯಾನೃ॒ತೇ ಅ॑ವ॒ಪಶ್ಯಂ॒ಜನಾ॑ನಾಂ। ಮ॒ಧು॒ಶ್ಚುತಃ॒ ಶುಚ॑ಯೋ॒ ಯಾಃ ಪಾ॑ವ॒ಕಾಸ್ತಾನ॒ ಆಪಃ॒ ಶಗ್ಗ್ ಸ್ಯೋ॒ನಾ ಭ॑ವಂತು॥
ಯಾಸಾಂ᳚ ದೇ॒ವಾ ದಿ॒ವಿ ಕೃ॒ಣ್ವಂತಿ॑ ಭ॒ಕ್ಷಂ ಯಾ ಅಂ॒ತರಿ॑ಕ್ಷೇ ಬಹು॒ಧಾ ಭವಂ॑ತಿ। ಯಾಃ ಪೃ॑ಥಿ॒ವೀಂ ಪಯ॑ಸೋ॒ಽನ್ದಂತಿ॑ ಶು॒ಕ್ರಾಸ್ತಾ ನ॒ ಆಪಃ॒ ಶಗ್ಗ್ ಸ್ಯೋ॒ನಾ ಭ॑ವಂತು॥
ಶಿ॒ವೇನ॑ ಮಾ॒ ಚಕ್ಷು॑ಷಾ ಪಶ್ಯತಾಪಃ ಶಿ॒ವಯಾ॑ ತ॒ನುವೋಽಪ॑ ಸ್ಪೃಶತ॒ ತ್ವಚಂ॑ ಮೇ। ಸರ್ವಾಗ್ಂ॑ ಅ॒ಗ್ನೀಗ್ಂರ॑ಪ್ಸು॒ಷದೋ॑ ಹುವೇ ವೋ॒ ಮಯಿ॒ ವರ್ಚೋ॒ ಬಲ॒ಮೋಜೋ॒ ನಿ ಧ॑ತ್ತ॥
ಯದ॒ದಃ ಸಂ॑ ಪ್ರಯ॒ತೀರಹಾ॒ವನ॑ದತಾಹ॒ ತೇ। ತಸ್ಮಾ॒ದಾ ನ॒ದ್ಯೋ॑ ನಾಮ॑ ಸ್ಥ॒ ತಾ ವೋ॒ ನಾಮಾ॑ನಿ ಸಿಂಧವಃ॥ ಯತ್ಪ್ರೇಷಿ॑ತಾ॒ ವರು॑ಣೇನ॒ ತಾಃ ಶೀಭಗ್ಂ॑ ಸ॒ಮವ॑ಲ್ಗತ। ತದಾ᳚ಪ್ನೋ॒ದಿಂದ್ರೋ॑ ವೋ ಯ॒ತೀಸ್ತಸ್ಮಾ॒ದಾಪೋ॒ ಅನು॑ ಸ್ಥನ॥ ಅ॒ಪ॒ಕಾ॒ಮಗ್ಗ್ ಸ್ಯಂದ॑ಮಾನಾ॒ ಅವೀ॑ವರತ ವೋ॒ ಹಿಕಂ᳚। ಇಂದ್ರೋ॑ ವಃ॒ ಶಕ್ತಿ॑ಭಿರ್ದೇವೀ॒ಸ್ತಸ್ಮಾ॒ದ್ವಾರ್ಣಾಮ॑ ವೋ ಹಿ॒ತಂ ಏಕೋ॑ ದೇ॒ವೋ ಅಪ್ಯ॑ತಿಷ್ಠ॒ಥ್ಸ್ಯಂದ॑ಮಾನಾ ಯಥಾವ॒ಶಂ। ಉದಾ॑ನಿಷುರ್ಮ॒ಹೀರಿತಿ॒ ತಸ್ಮಾ॑ದುದ॒ಕಮು॑ಚ್ಯತೇ॥ ಆಪೋ॑ ಭ॒ದ್ರಾ ಘೃ॒ತಮಿದಾಪ॑ ಆಸುರ॒ಗ್ನೀಷೋಮೌ॑ ಬಿಭ್ರ॒ತ್ಯಾಪ॒ ಇತ್ತಾಃ। ತೀ॒ವ್ರೋ ರಸೋ॑ ಮಧು॒ಪೃಚಾ॑ ಮರಂಗ॒ಮ ಆ ಮಾ᳚ ಪ್ರಾ॒ಣೇನ॑ ಸ॒ಹ ವರ್ಚ॑ಸಾಗನ್॥
ಆದಿತ್ಪ॑ಶ್ಯಾಮ್ಯು॒ತ ವಾ॑ ಶೃಣೋ॒ಮ್ಯಾ ಮಾ॒ ಘೋಷೋ॑ ಗಚ್ಛತಿ॒ ವಾಙ್ನ॑ ಆಸಾಂ। ಮನ್ಯೇ॑ ಭೇಜಾ॒ನೋ ಅ॒ಮೃತ॑ಸ್ಯ॒ ತರ್ಹಿ॒ ಹಿರ॑ಣ್ಯವರ್ಣಾ॒ ಅತೃ॑ಪಂ ಯ॒ದಾ ವಃ॑॥
ಆಪೋ॒ ಹಿಷ್ಠಾ ಮ॑ಯೋ॒ಭುವ॒ಸ್ತಾ ನ॑ ಊ॒ರ್ಜೇ ದ॑ಧಾತನ। ಮ॒ಹೇ ರಣಾ॑ಯ॒ ಚಕ್ಷ॑ಸೇ॥ ಯೋ ವಃ॑ ಶಿ॒ವತ॑ಮೋ॒ ರಸ॒ಸ್ತಸ್ಯ॑ ಭಾಜಯತೇ॒ಹ ನಃ॑। ಉ॒ಶ॒ತೀರಿ॑ವ ಮಾ॒ತರಃ॑॥ ತಸ್ಮಾ॒ ಅರಂ॑ ಗಮಾಮ ವೋ॒ ಯಸ್ಯ॒ ಕ್ಷಯಾ॑ಯ॒ ಜಿನ್ವ॑ಥ। ಆಪೋ॑ ಜ॒ನಯ॑ಥಾ ಚ ನಃ॥
ದಿ॒ವಿ ಶ್ರ॑ಯಸ್ವಾಂ॒ತರಿ॑ಕ್ಷೇ ಯತಸ್ವ ಪೃಥಿ॒ವ್ಯಾ ಸಂಭ॑ವ ಬ್ರಹ್ಮವರ್ಚ॒ಸಮ॑ಸಿ ಬ್ರಹ್ಮವರ್ಚ॒ಸಾಯ॑ ತ್ವಾ॥ ಅ॒ಪಾಂ ಗ್ರಹಾ᳚ನ್ಗೃಹ್ಣಾತ್ಯೇ॒ತದ್ವಾವ ರಾ॑ಜ॒ಸೂಯಂ॒ ಯದೇ॒ತೇ ಗ್ರಹಾಃ᳚ ಸ॒ವೋ᳚ಽಗ್ನಿರ್ವ॑ರುಣಸ॒ವೋ ರಾ॑ಜ॒ಸೂಯ॑ಮಗ್ನಿಸ॒ವಶ್ಚಿತ್ಯ॒ಸ್ತಾಭ್ಯಾ॑ಮೇ॒ವ ಸೂ॑ಯ॒ತೇಽಥೋ॑ ಉ॒ಭಾವೇ॒ವ ಲೋ॒ಕಾವ॒ಭಿ ಜ॑ಯತಿ॒ ಯಶ್ಚ॑ ರಾಜ॒ಸೂಯೇ॑ನೇಜಾ॒ನಸ್ಯ॒ ಯಶ್ಚಾ᳚ಗ್ನಿ॒ಚಿತ॒ ಆಪೋ॑ ಭವಂ॒ತ್ಯಾಪೋ॒ ವಾ ಅ॒ಗ್ನೇರ್ಭ್ರಾತೃ॑ವ್ಯಾ॒ ಯದ॒ಪೋ᳚ಽಗ್ನೇರ॒ಧಸ್ತಾ॑ದುಪ॒ದಧಾ॑ತಿ॒ ಭ್ರಾತೃ॑ವ್ಯಾಭಿಭೂತ್ಯೈ॒ ಭವ॑ತ್ಯಾ॒ತ್ಮನಾ॒ ಪರಾ᳚ಸ್ಯ॒ ಭ್ರಾತೃ॑ವ್ಯೋ ಭವತ್ಯ॒ಮೃತಂ॒ ವಾ ಆಪ॒ಸ್ತಸ್ಮಾ॑ದ॒ದ್ಭಿರವ॑ತಾಂತಮ॒ಭಿ ಷಿಂ॑ಚಂತಿ॒ ನಾರ್ತಿ॒ಮಾರ್ಚ್ಛ॑ತಿ॒ ಸರ್ವ॒ಮಾಯು॑ರೇತಿ॒॥
ಪವ॑ಮಾನಃ॒ ಸುವ॒ರ್ಜನಃ॑। ಪ॒ವಿತ್ರೇ॑ಣ॒ ವಿಚ॑ರ್ಷಣಿಃ। ಯಃ ಪೋತಾ॒ ಸ ಪು॑ನಾತು ಮಾ। ಪು॒ನಂತು॑ ಮಾ ದೇವಜ॒ನಾಃ। ಪು॒ನಂತು॒ ಮನ॑ವೋ ಧಿ॒ಯಾ। ಪು॒ನಂತು॒ ವಿಶ್ವ॑ ಆ॒ಯವಃ॑। ಜಾತ॑ವೇದಃ ಪ॒ವಿತ್ರ॑ವತ್। ಪ॒ವಿತ್ರೇ॑ಣ ಪುನಾಹಿ ಮಾ। ಶು॒ಕ್ರೇಣ॑ ದೇವ॒ ದೀದ್ಯ॑ತ್। ಅಗ್ನೇ॒ ಕ್ರತ್ವಾ॒ ಕ್ರತೂ॒ಗ್ಂ॒ರನು॑॥ ಯತ್ತೇ॑ ಪ॒ವಿತ್ರ॑ಮ॒ರ್ಚಿಷಿ॑। ಅಗ್ನೇ॒ ವಿತ॑ತಮಂತ॒ರಾ। ಬ್ರಹ್ಮ॒ ತೇನ॑ ಪುನೀಮಹೇ। ಉ॒ಭಾಭ್ಯಾಂ᳚ ದೇವ ಸವಿತಃ। ಪ॒ವಿತ್ರೇ॑ಣ ಸ॒ವೇನ॑ ಚ। ಇ॒ದಂ ಬ್ರಹ್ಮ॑ ಪುನೀಮಹೇ। ವೈ॒ಶ್ವ॒ದೇ॒ವೀ ಪು॑ನ॒ತೀ ದೇ॒ವ್ಯಾಗಾ᳚ತ್। ಯಸ್ಯೈ॑ ಬ॒ಹ್ವೀಸ್ತ॒ನುವೋ॑ ವೀ॒ತಪೃ॑ಷ್ಠಾಃ। ತಯಾ॒ ಮದಂ॑ತಃ ಸಧ॒ ಮಾದ್ಯೇ॑ಷು। ವ॒ಯಗ್ಗ್ ಸ್ಯಾ॑ಮ॒ ಪತ॑ಯೋ ರಯೀ॒ಣಾಂ॥ ವೈ॒ಶ್ವಾ॒ನ॒ರೋ ರ॒ಶ್ಮಿಭಿ॑ರ್ಮಾ ಪುನಾತು। ವಾತಃ॑ ಪ್ರಾ॒ಣೇನೇ॑ಷಿ॒ರೋ ಮ॑ಯೋ॒ಭೂಃ। ದ್ಯಾವಾ॑ಪೃಥಿ॒ವೀ ಪಯ॑ಸಾ॒ ಪಯೋ॑ಭಿಃ। ಋ॒ತಾವ॑ರೀ ಯ॒ಜ್ಞಿಯೇ॑ ಮಾ ಪುನೀತಾಂ। ಬೃ॒ಹದ್ಭಿಃ॑ ಸವಿತ॒ಸ್ತೃಭಿಃ॑। ವರ್ಷಿ॑ಷ್ಠೈರ್ದೇವ॒ ಮನ್ಮ॑ಭಿಃ। ಅಗ್ನೇ॒ ದಕ್ಷೈಃ᳚ ಪುನಾಹಿ ಮಾ। ಯೇನ॑ ದೇ॒ವಾ ಅಪು॑ನತ। ಯೇನಾಪೋ॑ ದಿ॒ವ್ಯಂ ಕಶಃ॑। ತೇನ॑ ದಿ॒ವ್ಯೇನ॒ ಬ್ರಹ್ಮ॑ಣಾ॥ ಇ॒ದಂ ಬ್ರಹ್ಮ॑ ಪುನೀಮಹೇ। ಯಃ ಪಾ॑ವಮಾ॒ನೀರ॒ಧ್ಯೇತಿ॑। ಋಷಿ॑ಭಿಃ॒ ಸಂಭೃ॑ತ॒ಗ್ಂ॒ ರಸಂ᳚। ಸರ್ವ॒ಗ್ಂ॒ ಸ ಪೂ॒ತಮ॑ಶ್ನಾತಿ। ಸ್ವ॒ದಿ॒ತಂ ಮಾ॑ತ॒ರಿಶ್ವ॑ನಾ। ಪಾ॒ವ॒ಮಾ॒ನೀರ್ಯೋ ಅ॒ಧ್ಯೇತಿ॑। ಋಷಿ॑ಭಿಃ॒ ಸಂಭೃ॑ತ॒ಗ್ಂ॒ ರಸಂ᳚। ತಸ್ಮೈ॒ ಸರ॑ಸ್ವತೀ ದುಹೇ। ಕ್ಷೀ॒ರಗ್ಂ ಸ॒ರ್ಪಿರ್ಮಧೂ॑ದ॒ಕಂ। ಪಾ॒ವ॒ಮಾ॒ನೀಃ ಸ್ವ॒ಸ್ತ್ಯಯ॑ನೀಃ॥ ಸು॒ದುಘಾ॒ ಹಿ ಪಯ॑ಸ್ವತೀಃ। ಋಷಿ॑ಭಿಃ॒ ಸಂಭೃ॑ತೋ॒ ರಸಃ॑। ಬ್ರಾ॒ಹ್ಮ॒ಣೇಷ್ವ॒ಮೃತಗ್ಂ॑ ಹಿ॒ತಂ। ಪಾ॒ವ॒ಮಾ॒ನೀರ್ದಿ॑ಶಂತು ನಃ। ಇ॒ಮಂ ಲೋ॒ಕಮಥೋ॑ ಅ॒ಮುಂ। ಕಾಮಾಂ॒ಥ್ಸಮ॑ರ್ಧಯಂತು ನಃ। ದೇ॒ವೀರ್ದೇ॒ವೈಃ ಸ॒ಮಾಭೃ॑ತಾಃ। ಪಾ॒ವ॒ಮಾ॒ನೀಃ ಸ್ವ॒ಸ್ತ್ಯಯ॑ನೀಃ। ಸು॒ದುಘಾ॒ ಹಿ ಘೃ॑ತ॒ಶ್ಚುತಃ॑। ಋಷಿ॑ಭಿಃ॒ ಸಂಭೃ॑ತೋ॒ ರಸಃ॑॥ ಬ್ರಾ॒ಹ್ಮ॒ಣೇಷ್ವ॒ಮೃತಗ್ಂ॑ ಹಿ॒ತಂ। ಯೇನ॑ ದೇ॒ವಾಃ ಪ॒ವಿತ್ರೇ॑ಣ। ಆ॒ತ್ಮಾನಂ॑ ಪು॒ನತೇ॒ ಸದಾ᳚। ತೇನ॑ ಸ॒ಹಸ್ರ॑ಧಾರೇಣ। ಪಾ॒ವ॒ಮಾ॒ನ್ಯಃ ಪು॑ನಂತು ಮಾ। ಪ್ರಾ॒ಜಾ॒ಪ॒ತ್ಯಂ ಪ॒ವಿತ್ರಂ᳚। ಶ॒ತೋದ್ಯಾ॑ಮಗ್ಂ ಹಿರ॒ಣ್ಮಯಂ᳚। ತೇನ॑ ಬ್ರಹ್ಮ॒ವಿದೋ॑ ವ॒ಯಂ। ಪೂ॒ತಂ ಬ್ರಹ್ಮ॑ ಪುನೀಮಹೇ। ಇಂದ್ರಃ॑ ಸುನೀ॒ತೀ ಸ॒ಹ ಮಾ॑ ಪುನಾತು। ಸೋಮಃ॑ ಸ್ವ॒ಸ್ತ್ಯಾ ವರು॑ಣಃ ಸ॒ಮೀಚ್ಯಾ᳚। ಯ॒ಮೋ ರಾಜಾ᳚ ಪ್ರಮೃ॒ಣಾಭಿಃ॑ ಪುನಾತು ಮಾ। ಜಾ॒ತವೇ॑ದಾ ಮೋ॒ರ್ಜಯಂ॑ತ್ಯಾ ಪುನಾತು॥
ಆಪೋ॒ ವಾ ಇ॒ದಗ್ಂ ಸರ್ವಂ॒ ವಿಶ್ವಾ॑ ಭೂ॒ತಾನ್ಯಾಪಃ॑ ಪ್ರಾ॒ಣಾ ವಾ ಆಪಃ॑ ಪ॒ಶವ॒ಆಪೋಽ- ನ್ನ॒ಮಾಪೋಽಮೃ॑ತ॒ಮಾಪಃ॑ ಸ॒ಮ್ರಾಡಾಪೋ॑ ವಿ॒ರಾಡಾಪಃ॑ ಸ್ವ॒ರಾಡಾಪ॒ಶ್ಛಂದಾ॒ಗ್॒ಸ್ಯಾಪೋ॒ ಜ್ಯೋತೀ॒ಗ್॒ಷ್ಯಾಪೋ॒ ಯಜೂ॒ಗ್॒ಷ್ಯಾಪಃ॑ ಸ॒ತ್ಯಮಾಪಃ॒ ಸರ್ವಾ॑ ದೇ॒ವತಾ॒ ಆಪೋ॒ ಭೂರ್ಭುವಃ॒ ಸುವ॒ರಾಪ॒ ಓಂ॥
ಅ॒ಪಃ ಪ್ರಣ॑ಯತಿ। ಶ್ರ॒ದ್ಧಾ ವಾ ಆಪಃ॑। ಶ್ರ॒ದ್ಧಾಮೇ॒ವಾರಭ್ಯ॑ ಪ್ರ॒ಣೀಯ॒ ಪ್ರಚ॑ರತಿ। ಅ॒ಪಃ ಪ್ರಣ॑ಯತಿ। ಯ॒ಜ್ಞೋ ವಾ ಆಪಃ॑॥ ಯ॒ಜ್ಞಮೇ॒ವಾರಭ್ಯ॑ ಪ್ರ॒ಣೀಯ॒ ಪ್ರಚ॑ರತಿ। ಅ॒ಪಃ ಪ್ರಣ॑ಯತಿ। ವಜ್ರೋ॒ ವಾ ಆಪಃ॑। ವಜ್ರ॑ಮೇ॒ವ ಭ್ರಾತೃ॑ವ್ಯೇಭ್ಯಃ ಪ್ರ॒ಹೃತ್ಯ॑ ಪ್ರ॒ಣೀಯ॒ ಪ್ರಚ॑ರತಿ। ಅ॒ಪಃ ಪ್ರಣ॑ಯತಿ। ಆಪೋ॒ ವೈ ರ॑ಕ್ಷೋ॒ಘ್ನೀಃ। ರಕ್ಷ॑ಸಾ॒ಮಪ॑ಹತ್ಯೈ। ಅ॒ಪಃ ಪ್ರಣ॑ಯತಿ। ಆಪೋ॒ ವೈ ದೇ॒ವಾನಾಂ᳚ ಪ್ರಿ॒ಯಂ ಧಾಮ॑। ದೇ॒ವಾನಾ॑ಮೇ॒ವ ಪ್ರಿ॒ಯಂ ಧಾಮ॑ ಪ್ರ॒ಣೀಯ॒ ಪ್ರಚ॑ರತಿ॥
ಭವಾನೀಶಂಕರಾಭ್ಯಾಂ ನಮಃ॥ ಮಲಾಪಕರ್ಷಣ ಸ್ನಾನಂ ಸಮರ್ಪಯಾಮಿ॥
ಪಂಚಾಮೃತ ಸ್ನಾನಮ್
ಪಂಚಾಮೃತ ದೇವತಾಭ್ಯೋ ನಮಃ। ಧ್ಯಾನಾಮಾವಾಹನಾದಿ ಷೋಡಶೋಪಚಾರ ಪೂಜಾಸ್ಸಮರ್ಪಯಾಮಿ।
ಭವಾನೀಶಂಕರ ಪ್ರೀತ್ಯರ್ಥಂ ಪಂಚಾಮೃತಸ್ನಾನಂ ಕರಿಷ್ಯಾಮಃ॥
ಕ್ಷೀರಸ್ನಾನಮ್
ಆಪ್ಯಾ॑ಯಸ್ವ॒ ಸಮೇ॑ತು ತೇ ವಿ॒ಶ್ವತ॑ಸ್ಸೋಮ॒ ವೃಷ್ಣಿ॑ಯಮ್। ಭವಾ॒ ವಾಜ॑ಸ್ಯ ಸಂಗ॒ಥೇ॥ ಭವಾನೀಶಂಕರಾಭ್ಯಾಂ ನಮಃ॥ ಕ್ಷೀರೇಣ ಸ್ನಪಯಾಮಿ॥ ಸ॒ದ್ಯೋಜಾ॒ತಂ ಪ್ರ॑ಪದ್ಯಾ॒ಮಿ॒ ಸ॒ದ್ಯೋಜಾ॒ತಾಯ॒ ವೈ ನಮೋ॒ ನಮಃ॑। ಭ॒ವೇ ಭ॑ವೇ॒ ನಾತಿ॑ಭವೇ ಭವಸ್ವ॒ ಮಾಮ್। ಭ॒ವೋದ್ಭ॑ವಾಯ॒ ನಮಃ॑॥ ಶುದ್ಧೋದಕ ಸ್ನಾನಂ ಸಮರ್ಪಯಾಮಿ॥
ದಧಿಸ್ನಾನಮ್
ದ॒ಧಿ॒ಕ್ರಾವ್ಣೋ॑ ಅಕಾರಿಷಂ ಜಿ॒ಷ್ಣೋರಶ್ವ॑ಸ್ಯ ವಾ॒ಜಿನಃ॑। ಸು॒ರ॒ಭಿ ನೋ॒ ಮುಖಾ॑ ಕರ॒ತ್ಪ್ರಾಣ॒ ಆಯೂಗ್ಂ॑ಷಿ ತಾರಿಷತ್॥ ಭವಾನೀಶಂಕರಾಭ್ಯಾಂ ನಮಃ॥ ದಧ್ನಾ ಸ್ನಪಯಾಮಿ॥ ವಾ॒ಮ॒ದೇ॒ವಾಯ॒ ನಮೋ᳚ ಜ್ಯೇ॒ಷ್ಠಾಯ॒ ನಮಃ॑ ಶ್ರೇ॒ಷ್ಠಾಯ॒ ನಮೋ॑ ರು॒ದ್ರಾಯ॒ ನಮಃ॒ ಕಾಲಾ॑ಯ॒ ನಮಃ॒ ಕಲ॑ವಿಕರಣಾಯ॒ ನಮೋ॒ ಬಲ॑ವಿಕರಣಾಯ॒ ನಮೋ॒ ಬಲಾ॑ಯ॒ ನಮೋ॒ ಬಲ॑ಪ್ರಮಥನಾಯ॒ ನಮಃ॒ ಸರ್ವ॑ಭೂತದಮನಾಯ॒ ನಮೋ॑ ಮ॒ನೋನ್ಮ॑ನಾಯ॒ ನಮಃ॑॥ ಶುದ್ಧೋದಕ ಸ್ನಾನಂ ಸಮರ್ಪಯಾಮಿ॥
ಆಜ್ಯಸ್ನಾನಮ್
ಶು॒ಕ್ರಮ॑ಸಿ॒ ಜ್ಯೋತಿ॑ರಸಿ॒ ತೇಜೋ॑ಸಿ ದೇ॒ವೋವ॑ಸ್ಸವಿ॒ತೋತ್ಪು॑ನಾ॒ತ್ವಚ್ಛಿ॑ದ್ರೇಣ ಪ॒ವಿತ್ರೇ॑ಣ॒ ವಸೋ॒ಸ್ಸೂರ್ಯ॑ಸ್ಯ ರ॒ಶ್ಮಿಭಿಃ॑॥ ಭವಾನೀಶಂಕರಾಭ್ಯಾಂ ನಮಃ॥ ಆಜ್ಯೇನ ಸ್ನಪಯಾಮಿ॥ ಅ॒ಘೋರೇ᳚ಭ್ಯೋಽಥ॒ಘೋರೇ᳚ಭ್ಯೋ॒ ಘೋರ॒ಘೋರ॑ತರೇಭ್ಯಃ। ಸರ್ವೇ᳚ಭ್ಯಃ ಸರ್ವ॒ಶರ್ವೇ᳚ಭ್ಯೋ॒ ನಮ॑ಸ್ತೇ ಅಸ್ತು ರು॒ದ್ರರೂ॑ಪೇಭ್ಯಃ॥ ಶುದ್ಧೋದಕ ಸ್ನಾನಂ ಸಮರ್ಪಯಾಮಿ॥
ಮಧುಸ್ನಾನಮ್
ಮಧು॒ವಾತಾ॑ ಋತಾಯ॒ತೇ ಮಧು॑ಕ್ಷರಂತಿ॒ ಸಿಂಧ॑ವಃ। ಮಾಧ್ವೀ᳚ರ್ನಃ ಸಂ॒ತ್ವೌಷ॑ಧೀಃ। ಮಧು॒ನಕ್ತ॑ಮು॒ತೋಷ॑ಸಿ॒ ಮಧು॑ಮ॒ತ್ಪಾರ್ಥಿ॑ವ॒ಗ್ಂ॒ ರಜಃ॑। ಮಧು॒ದ್ಯೌರ॑ಸ್ತು ನಃ ಪಿ॒ತಾ। ಮಧು॑ಮಾನ್ನೋ॒ ವನ॒ಸ್ಪತಿ॒ರ್ಮಧು॑ಮಾಗ್ಂ ಅಸ್ತು॒ ಸೂರ್ಯಃ॑। ಮಾಧ್ವೀ॒ರ್ಗಾವೋ॑ ಭವಂತು ನಃ। ಭವಾನೀಶಂಕರಾಭ್ಯಾಂ ನಮಃ॥ ಮಧುನಾ ಸ್ನಪಯಾಮಿ॥ ತತ್ಪುರು॑ಷಾಯ ವಿ॒ದ್ಮಹೇ॑ ಮಹಾದೇ॒ವಾಯ॑ ಧೀಮಹಿ। ತನ್ನೋ॑ ರುದ್ರಃ ಪ್ರಚೋ॒ದಯಾ᳚ತ್॥ ಶುದ್ಧೋದಕ ಸ್ನಾನಂ ಸಮರ್ಪಯಾಮಿ॥
ಶರ್ಕರಸ್ನಾನಮ್
ಸ್ವಾ॒ದುಃ ಪ॑ವಸ್ವ ದಿ॒ವ್ಯಾಯ॒ ಜನ್ಮ॑ನೇ। ಸ್ವಾ॒ದುರಿಂದ್ರಾ᳚ಯ ಸು॒ಹವೀ᳚ತು ನಾಮ್ನೇ। ಸ್ವಾ॒ದುರ್ಮಿ॒ತ್ರಾಯ॒ ವರು॑ಣಾಯ ವಾ॒ಯವೇ॒। ಬೃಹ॒ಸ್ಪತ॑ಯೇ॒ ಮಧು॑ಮಾಂ॒ ಅದಾ᳚ಭ್ಯಃ। ಭವಾನೀಶಂಕರಾಭ್ಯಾಂ ನಮಃ॥ ಶರ್ಕರಯಾಸ್ನಪಯಾಮಿ॥ ಈಶಾನಃ ಸರ್ವ॑ವಿದ್ಯಾ॒ನಾ॒ಮೀಶ್ವರಃ ಸರ್ವ॑ಭೂತಾ॒ನಾಂ॒ ಬ್ರಹ್ಮಾಧಿ॑ಪತಿ॒ರ್ಬ್ರಹ್ಮ॒ಣೋಽಧಿ॑ಪತಿ॒ರ್ಬ್ರಹ್ಮಾ॑ ಶಿ॒ವೋ ಮೇ॑ ಅಸ್ತು ಸದಾಶಿ॒ವೋಮ್॥ ಶುದ್ಧೋದಕ ಸ್ನಾನಂ ಸಮರ್ಪಯಾಮಿ॥
ಫಲೋದಕ ಸ್ನಾನಮ್
ಯಾಃ ಫ॒ಲಿನೀ॒ರ್ಯಾ ಅ॑ಫ॒ಲಾ ಅ॑ಪು॒ಷ್ಪಾ ಯಾಶ್ಚ॑ ಪು॒ಷ್ಪಿಣೀಃ᳚। ಬೃಹ॒ಸ್ಪತಿ॑ ಪ್ರಸೂತಾ॒ಸ್ತಾ ನೋ॑ ಮುಂಚಂ॒ತ್ವಗ್ಂಹ॑ಸಃ॥ ನಾರಿಕೇಳಫಲೋದಕೇನ ಸ್ನಪಯಾಮಿ॥
ಗಂಧೋದಕ ಸ್ನಾನಮ್
ಗಂ॒ಧ॒ದ್ವಾ॒ರಾಂ ದು॑ರಾಧ॒ರ್॒ಷಾಂ॒ ನಿ॒ತ್ಯಪು॑ಷ್ಟಾಂ ಕರೀ॒ಷಿಣೀಂ᳚। ಈ॒ಶ್ವರೀಗ್ಂ॑ ಸರ್ವ॑ಭೂತಾ॒ನಾಂ॒ ತಾಮಿ॒ಹೋಪ॑ಹ್ವಯೇ॒ ಶ್ರಿಯಂ॥ ಗಂಧೋದಕೇನ ಸ್ನಪಯಾಮಿ॥
ಪುಷ್ಪೋದಕ ಸ್ನಾನಮ್
ಯೋ॑ಽಪಾಂ ಪುಷ್ಪಂ॒-ವೇಁದ॑। ಪುಷ್ಪ॑ವಾನ್ ಪ್ರ॒ಜಾವಾ᳚ನ್ ಪಶು॒ಮಾನ್ ಭ॑ವತಿ। ಚಂ॒ದ್ರಮಾ॒ ವಾ ಅ॒ಪಾಂ ಪುಷ್ಪಂ᳚। ಪುಷ್ಪ॑ವಾನ್ ಪ್ರ॒ಜಾವಾ᳚ನ್ ಪಶು॒ಮಾನ್ ಭ॑ವತಿ॥ ಪುಷ್ಪೋದಕೇನ ಸ್ನಪಯಾಮಿ॥
ಅಕ್ಷತೋದಕ ಸ್ನಾನಮ್
ಆಯ॑ನೇತೇ ಪ॒ರಾಯ॑ಣೇ॒ ದೂರ್ವಾರೋಹಂತು ಪು॒ಷ್ಪಿಣೀಃ। ಹೃ॒ದಾಶ್ಚ॑ ಪುಂ॒ಡರೀಕಾಣಿ ಸಮು॒ದ್ರಸ್ಯ॑ ಗೃ॒ಹಾ ಇ॒ಮೇ॥ ಅಕ್ಷತೋದಕೇನ ಸ್ನಪಯಾಮಿ॥
ಸುವರ್ಣೋದಕ ಸ್ನಾನಮ್
ತತ್ಸು॒ವರ್ಣ॒ಗ್ಂ॒ ಹಿರ॑ಣ್ಯಮಭವತ್। ತಥ್ಸು॒ವರ್ಣ॑ಸ್ಯ॒ ಹಿರ॑ಣ್ಯಸ್ಯ॒ ಜನ್ಮ॑। ಯ ಏ॒ವಗ್ಂ ಸು॒ವರ್ಣ॑ಸ್ಯ॒ ಹಿರ॑ಣ್ಯಸ್ಯ॒ ಜನ್ಮ॒ ವೇದ॑। ಸು॒ವರ್ಣ॑ ಆ॒ತ್ಮನಾ॑ ಭವತಿ॥ ಸುವರ್ಣೋದಕೇನ ಸ್ನಪಯಾಮಿ॥
ರುದ್ರಾಕ್ಷೋದಕ ಸ್ನಾನಮ್
ತ್ರ್ಯಂ॑ಬಕಂ ಯಜಾಮಹೇ ಸುಗಂ॒ಧಿಂ ಪು॑ಷ್ಟಿ॒ವರ್ಧ॑ನಂ। ಉ॒ರ್ವಾ॒ರು॒ಕಮಿ॑ವ॒ ಬಂಧ॑ನಾನ್ಮೃ॒ತ್ಯೋರ್ಮು॑ಕ್ಷೀಯ॒ ಮಾಮೃತಾ᳚ತ್॥ ರುದ್ರಾಕ್ಷೋದಕೇನ ಸ್ನಪಯಾಮಿ॥
ಭಸ್ಮೋದಕ ಸ್ನಾನಮ್
ಮಾ ನೋ॑ ಮ॒ಹಾಂತ॑ಮು॒ತ ಮಾ ನೋ॑ ಅರ್ಭ॒ಕಂ ಮಾ ನ॒ ಉಕ್ಷಂ॑ತಮು॒ತ ಮಾ ನ॑ ಉಕ್ಷಿ॒ತಂ। ಮಾ ನೋ॑ ವಧೀಃ ಪಿ॒ತರಂ॒ ಮೋತ ಮಾ॒ತರಂ॑ ಪ್ರಿ॒ಯಾ ಮಾ ನ॑ಸ್ತ॒ನುವೋ॑ ರುದ್ರ ರೀರಿಷಃ॥ ಭಸ್ಮೋದಕೇನ ಸ್ನಪಯಾಮಿ॥
ಬಿಲ್ವೋದಕ ಸ್ನಾನಮ್
ಮಾ ನ॑ಸ್ತೋ॒ಕೇ ತನ॑ಯೇ॒ ಮಾ ನ॒ ಆಯು॑ಷಿ॒ ಮಾ ನೋ॒ ಗೋಷು॒ ಮಾ ನೋ॒ ಅಶ್ವೇ॑ಷು ರೀರಿಷಃ। ವೀ॒ರಾನ್ಮಾ ನೋ॑ ರುದ್ರ ಭಾಮಿ॒ತೋ ವ॑ಧೀರ್ಹ॒ವಿಷ್ಮಂ॑ತೋ॒ ನಮ॑ಸಾ ವಿಧೇಮ ತೇ॥ ಬಿಲ್ವೋದಕೇನ ಸ್ನಪಯಾಮಿ॥
ದೂರ್ವೋದಕ ಸ್ನಾನಮ್
ಕಾಂಡಾ᳚ತ್ಕಾಂಡಾತ್ ಪ್ರ॒ರೋಹಂ॑ತೀ॒ ಪರು॑ಷಃಪರುಷಃ॒ ಪರಿ॑। ಏ॒ವಾ ನೋ॑ ದೂರ್ವೇ॒ ಪ್ರತ॑ನು ಸ॒ಹಸ್ರೇ॑ಣ ಶ॒ತೇನ॑ ಚ॥ ದೂರ್ವೋದಕೇನ ಸ್ನಪಯಾಮಿ॥
ರುದ್ರಾಭಿಷೇಕಂ
ಓಂ ಅಸ್ಯ ಶ್ರೀರುದ್ರಪ್ರಶ್ನಮಹಾಮಂತ್ರಸ್ಯ। ಅಘೋರ ಋಷಿಃ। ಅನುಷ್ಟುಪ್ ಛಂದಃ। ಸಂಕರ್ಷಣಮೂರ್ತಿಸ್ವರೂಪೋಯಃ ಅಸಾವಾದಿತ್ಯಃ ಪರಮಪುಪುರುಷಃ ಸ ಏಷ ರುದ್ರೋ ದೇವತಾ। ನಮಶ್ಶಿವಾಯೇತಿ ಬೀಜಮ್। ಶಿವತರಾಯೇತಿ ಶಕ್ತಿಃ। ಮಹಾದೇವಾಯೇತಿ ಕೀಲಕಮ್। ಸಾಂಬಪರಮೇಶ್ವರ ಪ್ರಸಾದ ಸಿದ್ಧ್ಯರ್ಥೇ ಏಕವಾರಂ [ಏಕಾದಶವಾರಂ/ಶತವಾರಂ] ರುದ್ರಜಪಾಭಿಷೇಕೇ ವಿನಿಯೋಗಃ॥
ಕರನ್ಯಾಸಃ
ಅಗ್ನಿಹೋತ್ರಾತ್ಮನೇ ಅಂಗುಷ್ಠಾಭ್ಯಾಂ ನಮಃ। ದಶಪೂರ್ಣಮಾಸಾತ್ಮನೇ ತರ್ಜನೀಭ್ಯಾಂ ನಮಃ। ಚಾತುರ್ಮಾಸ್ಯಾತ್ಮನೇ ಮಧ್ಯಮಾಭ್ಯಾಂ ನಮಃ। ನಿರೂಢಪಶುಬಂಧಾತ್ಮನೇ ಅನಾಮಿಕಾಭ್ಯಾಂ ನಮಃ। ಜ್ಯೋತಿಷ್ಟೋಮಾತ್ಮನೇ ಕನಿಷ್ಠಿಕಾಭ್ಯಾಂ ನಮಃ। ಸರ್ವಕ್ರತ್ವಾತ್ಮನೇ ಕರತಲಕಪೃಷ್ಠಾಭ್ಯಾಂ ನಮಃ॥
ಅಂಗನ್ಯಾಸಃ
ಅಗ್ನಿಹೋತ್ರಾತ್ಮನೇ ಹೃದಯಾಯ ನಮಃ। ದಶಪೂರ್ಣಮಾಸಾತ್ಮನೇ ಶಿರಸೇ ಸ್ವಾಹಾ। ಚಾತುರ್ಮಾಸ್ಯಾತ್ಮನೇ ಶಿಖಾಯೈ ವಷಟ್। ನಿರೂಢಪಶುಬಂಧಾತ್ಮನೇ ಕವಚಾಯ ಹುಮ್। ಜ್ಯೋತಿಷ್ಟೋಮಾತ್ಮನೇ ನೇತ್ರತ್ರಯಾಯ ವೌಷಟ್। ಸರ್ವಕ್ರತ್ವಾತ್ಮನೇ ಅಸ್ತ್ರಾಯ ಫಟ್। ಭೂರ್ಭುವಸ್ಸುವರೋಮಿತಿ ದಿಗ್ಬಂಧಃ॥
ಧ್ಯಾನಮ್॥
ಆಪಾತಾಲ-ನಭನ್ಥ್ಸಲಾಂತ-ಭುವನ-ಬ್ರಹ್ಮಾಂಡಮಾವಿಸ್ಫುರಜ್ಜ್ಯೋತಿಃ। ಸ್ಫಾಟಿಕ ಲಿಂಗಮೌಲಿ ವಿಲಸ್ತ್ಪೂಣೇಂದುವಾಂತಾಮೃತ್ಯೈಃ। ಅಸ್ತೋಕಾಪ್ಲುತಮೇಕಮೀಶಮನಿಶಂ ರುದ್ರಾನುವಾಕಾನ್ ಜಪನ್। ಧ್ಯಾಯೇದೀಪ್ಸಿತ ಸಿದ್ಧಯೇ ಧ್ರುವಪದಂ ವಿಪ್ರೋಽಭಿಷಿಂಚೇಚ್ಛಿವಮ್॥ ಬ್ರಹ್ಮಾಂಡವ್ಯಾಪ್ತರೇಹಾಭಸಿತ ಹಿಮರುಚಾ ಭಾಸಮಾನಾ ಭುಜಂಗೈಃ। ಕಂಠೇ ಕಾಲಾಃ ಕಪರ್ದಾ ಕಲಿತ ಶಶಿಕಲಾಶ್ಚಂಡಕೋದಂಡಹಸ್ತಾಃ। ತ್ರ್ಯಕ್ಷಾರುದ್ರಾಕ್ಷಭೂಷಾಃ ಪ್ರಣತಭಯಹರಾಶ್ಶಾಂಭವಾ ಮೂರ್ತಿಭೇದಾಃ। ರುದ್ರಾಶ್ಶೀರುದ್ರಸೂಕ್ತ ಪ್ರಕಟಿತವಿಭವಾನಃ ಪ್ರಯಚ್ಛಂತು ಸೌಖ್ಯಮ್॥
ಶುದ್ಧಸ್ಫಟಿಕಸಂಕಾಶಂ ಶುದ್ಧವಿದ್ಯಾ ಪ್ರದಾಯಕಮ್। ಶುದ್ಧ ಪೂರ್ಣಂ ಚಿದಾನಂದಂ ಸದಾಶಿವಮಹಂ ಭಜೇ॥
ಓಂ ಗ॒ಣಾನಾಂ᳚ ತ್ವಾ ಗ॒ಣಪ॑ತಿಗ್ಂ ಹವಾಮಹೇ ಕ॒ವಿಂ ಕ॑ವೀ॒ನಾಮು॑ಪ॒ಮಶ್ರ॑ವಸ್ತಮಂ। ಜ್ಯೇ॒ಷ್ಠ॒ರಾಜಂ॒ ಬ್ರಹ್ಮ॑ಣಾಂ ಬ್ರಹ್ಮಣಸ್ಪತ॒ ಆ ನಃ॑ ಶೃ॒ಣ್ವನ್ನೂ॒ತಿಭಿ॑ಸ್ಸೀದ॒ ಸಾದ॑ನಂ॥ ಮಹಾಗಣಪತಯೇ॒ ನಮಃ॥
ಶಂ ಚ॑ ಮೇ॒ ಮಯ॑ಶ್ಚ ಮೇ. ಪ್ರಿ॒ಯಂ ಚ॑ ಮೇಽನುಕಾ॒ಮಶ್ಚ॑ ಮೇ॒ ಕಾಮ॑ಶ್ಚ ಮೇ ಸೌಮನ॒ಸಶ್ಚ॑ ಮೇ ಭ॒ದ್ರಂ ಚ॑ ಮೇ॒. ಶ್ರೇಯ॑ಶ್ಚ ಮೇ॒ ವಸ್ಯ॑ಶ್ಚ ಮೇ॒ ಯಶ॑ಶ್ಚ ಮೇ॒ ಭಗ॑ಶ್ಚ ಮೇ॒. ದ್ರವಿ॑ಣಂ ಚ ಮೇ ಯಂ॒ತಾ ಚ॑ ಮೇ ಧ॒ರ್ತಾ ಚ॑ ಮೇ॒. ಕ್ಷೇಮ॑ಶ್ಚ ಮೇ॒ ಧೃತಿ॑ಶ್ಚ ಮೇ॒ ವಿಶ್ವಂ॑ ಚ ಮೇ॒ ಮಹ॑ಶ್ಚ ಮೇ ಸಂ॒ವಿಚ್ಚ॑ ಮೇ॒ ಜ್ಞಾತ್ರಂ॑ ಚ ಮೇ॒ ಸೂಶ್ಚ॑ ಮೇ ಪ್ರ॒ಸೂಶ್ಚ॑ ಮೇ॒ ಸೀರಂ॑ ಚ ಮೇ ಲ॒ಯಶ್ಚ॑ ಮ ಋ॒ತಂ ಚ॑ ಮೇ॒ಽಮೃತಂ॑ ಚ ಮೇಽಯ॒ಕ್ಷ್ಮಂ ಚ॒ ಮೇಽನಾ॑ಮಯಚ್ಚ ಮೇ ಜೀ॒ವಾತು॑ಶ್ಚ ಮೇ ದೀರ್ಘಾಯು॒ತ್ವಂ ಚ॑ ಮೇಽನಮಿ॒ತ್ರಂ ಚ॒ ಮೇಽಭ॑ಯಂ ಚ ಮೇ ಸು॒ಗಂ ಚ॑ ಮೇ॒ ಶಯ॑ನಂ ಚ ಮೇ ಸೂ॒ಷಾ ಚ॑ ಮೇ ಸು॒ದಿನಂ॑ ಚ ಮೇ॥
ಚಮಕಮ್
ದಿಗ್ವಿಮೋಕಃ
ಅಗ್ನಿಹೋತ್ರಾತ್ಮನೇ ಹೃದಯಾಯ ನಮಃ। ದಶಪೂರ್ಣಮಾಸಾತ್ಮನೇ ಶಿರಸೇ ಸ್ವಾಹಾ। ಚಾತುರ್ಮಾಸ್ಯಾತ್ಮನೇ ಶಿಖಾಯೈ ವಷಟ್। ನಿರೂಢಪಶುಬಂಧಾತ್ಮನೇ ಕವಚಾಯ ಹುಮ್। ಜ್ಯೋತಿಷ್ಟೋಮಾತ್ಮನೇ ನೇತ್ರತ್ರಯಾಯ ವೌಷಟ್। ಸರ್ವಕ್ರತ್ವಾತ್ಮನೇ ಅಸ್ತ್ರಾಯ ಫಟ್। ಭೂರ್ಭುವಸ್ಸುವರೋಮಿತಿ ದಿಗ್ವಿಮೋಕಃ॥